Татарстанда бер ел эчендә 376 шәһәрара йөртүче хокук бозган

Татарстанда быел шәһәрара маршрутларда эшләүче 376 йөртүчене административ җаваплылыкка тарттылар. Бу хакта «Татар-информ» МА матбугат конференциясендә Ространснадзор дәүләт автоюл күзәтчелеге Урта-Идел төбәкара идарәсе башлыгы вазифаларын башкаручы Радик Рамазанов хәбәр итте.

Спикер республикада легаль булмаган ташучылар эшчәнлеген чикләү эше дәвам итүен сөйләде.

"Кызганычка каршы, даими маршрутларда заказлы ташучылар бар әле. Алар канун таләпләрен игътибарсыз калдыра, пассажирлар йөртүне мөстәкыйль оештыра, үзләрен "заказной" дип атый һәм теге яки бу юнәлештә йөри ", - дип билгеләде ул.

Рамазанов ассызыклаганча, заказлы автобус ташулар рөхсәт ителмәгән.

"Пассажирларны автовокзаллардан гына алып китәргә, маршрут картасы булган очракта йөрергә мөмкин. Бездә мари һәм Чаллы юнәлешләре шактый катлаулы иде. Без хәлне үзгәртә алдык. Чаллы ташучыларын легальләштерделәр, алар конкурс процедураларын үтте, маршрут карталарын алды һәм даими рәвештә пассажирлар йөртү белән шөгыльләнә ", - дип билгеләде ул.

Спикер пассажирларны Яңа ел бәйрәмнәрендә халыкара маршрутларда йөртү шулай ук контроль астында булачак, дип ышандырды.

Фото: Султан Исхаков

Чыганак: tatar-inform.ru