“Әҗәткә акча бирмим дә, алмыйм да”

Дөрес, халыкның бер-берсеннән бурычка алган суммасы банк кредитларыннан күпкә ким. Җаваплар күрсәткәнчә, русиялеләр әҗәткә берьюлы уртача 8700 сум биреп торалар икән. Аны кайтару вакытына килгәндә, күпчелек очракта, гадәттә, "акча алганчы"га кадәр.

Әмма әҗәтен вәгъдә ителгән вакытта яки бөтенләй дә бирмәүчеләр дә бар икән. "Кешегә ышана торган түгел икән", "бүтән беркемгә дә бер тиен дә бирмим" ише җаваплар ишеткән социологлар. Дөрес, сораштыруда катнашкан берәү дә мин әҗәтемне кайтармадым дип танырга җөрьәт итмәгән, югыйсә, араларында андый кешеләр дә юк түгелдер.

Экспертлар әйтүенчә, шушы рәвешле бер-береңнән акча алып тору күренеше нигездә бер Русиягә генә хас, "рәсми булмаган займ" дигән нәрсә дөньяның бүтән бер генә илендә дә болай киң таралмаган икән. "Бер караганда, бу - яхшы гамәл, бигрәк тә алып торган кешегә - бернинди мәшәкатьсез-нисез акчалы була ул. Ләкин, икенче яктан, аның кире кайтмау куркынычы бар бит, ә биреп торган кешенең кулында гадәттә моны раслаучы бернинди дә документ булмый.

http://tatyash.ru