Замана баласы ничек һөнәр сайлый

Лабораторияләр урамга чыкты

Тантаналы чараны Та­тарстанның мәгариф һәм фән министры Рафис Бор­һанов һәм Казан федераль университеты ректоры Илшат Гафуров ачып җибәрде. Ректор  мәктәп укучылары арасында үткән “Ни өчен КФУ?” бәй­гесенә йомгак ясап, бүләк – iPhonны  152 нче гимназия укучысы Анастасия Беловага тапшырды. “Без бу чараны беренче тапкыр гына уздырмыйбыз. Үзебезнең эшчән­ле­гебезне кызыклырак формада күр­сәтергә кирәк. Белем һәм фән дөньясындагы проблемалар, казанышлар турында да сөйләргә телибез. Кызыксынучыларның со­­рауларына да җавап би­рәбез. Чарада күп кенә кызыклы программалар тәкъ­дим ителде”, – диде Илшат Гафуров, бәйрәмне ачып җи­бә­реп. Рафис Борһанов исә “Ачышлар төне”нең ел саен көтеп ала торган гадәти чарага әверелә баруын белдерде.  “Без чыгарылыш сыйныф укучыла­ры­ның дөрес  юнә­леш сайлаулары турында күп сөйләшәбез. Казан федераль университеты диварларында бүген булачак абитуриентлар бе­лән әңгәмәләр үткәрә­ләр, фикер алышалар”, – диде ул.

Вузның 14 институты тарафыннан корылган чатырларда ниләр генә оештырылмаган иде. Төрле-төрле мас­тер-класслар, интерактив уеннар... Ак колонналы университет әнә шундый ук ак төстәге чатырлар чолганышында калган иде. Кемдер робот техникасын эшкә җик­кән, кемдер химик ачышлар күрсәтә, кемдер төрле-төрле уеннар тәкъдим итә. Замана баласын кызык­сын­дыруның төрле юлларын эзлиләр бүген. Әйтергә ки­рәк, кызыксынып килүчеләр алдагы елларга караганда күп булды. Күпчелек үзенең сайлаган  юнәлеше буенча берникадәр консультация алырга да килгән. Чыгарылыш сыйныф укучылары гына түгел, араларында кечкенә балалар да бар. Төрле уеннарда катнашып, квест-вик­ториналарда җиңү яулаучылар да булды. Гомумән, катнашучылар арасында мах­сус бүләкләр дә күп уйнатылды. Чараны оештыручылар да канәгать. Би­регә килгән укучы килә­чәктә барыбер шул юнәлеш­не сайлаячакларына өмет­ләре зурдан оешты­ручыларның. “Фән төне”ндә IV Халыкара педагогик белем бирү форумында катнашучылар да бар иде. Анда Рос­сиянең – 93 һәм 65 чит ил вузларыннан килүче­ләр булачак студентлар бе­лән аралашты.

Сыйфатлы басма бизнеска әйләнә алмый

КФУның Югары Журна­лис­тика мәктәбе дә катнашучылар өчен интерактив программа әзерләгән иде. Анда һәркемгә телеэкран йолдызы кебек хис итәргә мөмкин­лек бирелде.  Univer TV камералары “Ачышлар төне” кунакларын рәхәтләнеп телеэкраннан сөйләтте. “Без практик юнәлештә студентлар белән күп эшлибез, бу юлы да шуңа интерактив мәйданчык оештырдык”, – дип сөйли Юга­ры Журналистика мәк­тәбе директоры Леонид Толчинский. Институт базасында бу көнне мастер-класслар гына түгел, Халыкара фәнни-гамәли конференция дә уз­дырылды. “Татар телле мәгъ­лүмат кыры­ның үсеш проблемалары: тарихи тәҗрибә һәм заман чакыруы” дип аталган чара “Ватаным Татарстан” газетасы­ның 100 еллык юбилеена багышланды. Кон­ференциядә “Татмедиа” республика матбугат һәм масса­күләм комму­ни­кация­ләр агентлыгы җи­тәкчесе урынбасары Илдар Миргалимов катнашты. Ул Татарстандагы гаммәви мәгъ­лүмат чараларына күзәтү ясап, басма матбугатның саны 561гә җиткәнен белдерде. Ә йөз яшьлек газетаның татар телле басмалар арасында зур урын алып торуын билгеләп, аны күпер ролен үтәүче басма дип атады. 

Конференциядә  яңгы­раган фикерләр күп­ләрдә теләк­тәшлек тә, бәхәс тә уятты. Бигрәк тә “Ватаным Татарстан” газетасы баш мөхәр­рире Миңназыйм Сә­фәров тыңлаучыларны уйланырга мәҗбүр итте. “Без­нең хәзер  сан бар, сыйфатка эшләр чак, – диде ул. – Моның өчен газета ихлас булырга тиеш. Йөрә­гең аша үткәреп язылган язмалар гына укучыга барып җитә. Бездә әле сүз кадере бар. Әдәби тел ки­рәк­ми дигән сүз белән бөтенләй килешмим. Тел тупаслыгы колакны ерта башлый, шунда берәр хикәя, шигырь укысаң, саф һава килеп кергәндәй була. Кешенең теле дә, фикере дә камил булырга тиеш. Балалар бакчасында татар теленә өйрәт­мәсеннәр, мәктәптә укытмасыннар, университетта тәр­бияләмәсеннәр – ниш­ләргә кала?! Без болай да матбугатны көнкүреш дәрәҗә­сенә төшереп, аның тел куллану дәрәҗәсен бетердек. Ина­нуымча сыйфатлы басмалар бизнеска әйләнергә тиеш түгел”.

Баш мөхәррир тел, мил­ләт, кешенең яшәеше темаларын газета битләрендә яктырту турында гына сөйләп калмады, бүген редакция­ләр­нең иң авырткан җире – почтаның ни дәрәҗәдә эш­ләве, вакытында газеталар­ның таратылмавына борчылуын да белдерде. “Элек бер кеше, газета килмәде, дип хә­бәр итсә, хәзер дүрт тапкыр чыккан басманы атнага бер генә китерүләрен язалар. Поч­та килешүне боза”, – дип сөйли Миңназыйм Сәфәров.

Фәнни-гамәли конференция газета эшчәнлеген төрле яктан яктыртты. Галиәсгар Камал, Муса Җәлил, Гадел Кутуй, Гомәр Бәшировлар кебек язучы-шагыйрьләр эш­ләгән абруйлы басманың оста каләмле журналистлары турында татар журналистикасы кафедрасы мөдире Васил Гарифуллин сүз алды. Газета – республиканың елъязмачысы, бер гасырлык газетада күпме темалар күтәрел­гән, күпме иҗатчылар каләм чарлаган. Газетаны фәнни яктан өйрәнү әле алга таба да дәвам итәчәк. Моны без студентларның ясаган чыгышларыннан белдек. Бер ел дәвамында “Ватаным Татарстан” газетасын фәнни яктан өйрәнеп язучылар исә  “Фән төне”ндә газетаның махсус дипломына да ия булдылар.

Чарадан мондый сөй­ләшүләр бик кирәк, яза бел­гән белемле студентлар бар, дигән фикер белән таралыштык. Үз матбугатыбыз өчен үзебез укучылар әзер­ләмә­гәндә, үзара диалог булмаганда алда торган проблемаларны чишү кыен булачак. Журналистика җиңел була алмый, аның эшчәнлегенә һәркем үз өлешен керткәндә генә үзеңнеке була ул.

Фото: http://www.vatantat.ru
http://www.vatantat.ru