Эвакуациягә - уңай билге
Кемероводагы сәүдә үзәгендә булган янгыннан соң халыкны куркыныч турында кисәтү, эвакуацияләү, хәбәр итү системаларының төзеклеген тикшерү белән бәйле чаралар күрүгә игътибар нык артты.
Саба район судында Суд приставлары федераль хезмәтенең республика идарәсе, Гражданнар оборонасы һәм гадәттән тыш хәлләр министрлыгы белән берлектә һәм җәмәгать судьялары һәм алар аппараты хезмәткәрләре катнашында хезмәткәрләргә янгын куркынычсызлыгының төп таләпләрен, янгынга каршы саклану чаралары һәм янгын чыккан очракта ниләр эшләргә кирәклеген аңлату максатыннан янгын куркынычсызлыгы буенча планлы тактик өйрәнүләр үткәрелде. Сценарий буенча суд бинасының канцелярия кабинетында кыска ялганыштан “янгын“ чыкты, ут мебельгә күчте, коридор буйлап төтен таралды. Тавышлы хәбәр итү системасы эшли башлаганнан соң барлык хезмәткәрләр һәм бирегә килгән кешеләр бинадан чыктылар. Гадәттән тыш хәл урынына янгын сүндерүчеләр, медиклар, полиция хезмәткәрләре килде. Бина санаулы минутларда чолгап алынды, ә коткаручылар янгынны сүндерүгә керештеләр. Янгын сүндерүчеләргә, “бер хезмәткәрнең ялкын телләре үрмәләгән“ кабинетта калуы хакында җиткерелде. Коткаручылар аны, кислород белән тәэмин иткән махсус битлек кигезеп, янгын зонасыннан алып чыктылар һәм медикларга тапшырдылар. Табиблар зыян күрүченең йөрәгенә массаж ясаганнан, ясалма сулыш алдырганнан соң аны тормышка кайтардылар. Янгын сүндерүчеләр кабаттан “ялкын телләрен” авызлыкларга керештеләр. Ишектән чыга алмаган ике хезмәткәргә тәрәзә аша чыгу өчен озын баскыч куелды. Эвакуация төгәлләнгәч, утсүндергечләр белән ничек эш итәргә кирәклеген аңлаткан инструктаж үткәрелде.
Тулырак язманы "Саба таңнары" газетасында укый аласыз
Автор фотолары
Следите за самым важным и интересным в Telegram-каналеТатмедиа
Нет комментариев