“Фирүзә” агитбригадасы кырларда
Туган ягыбыз кырларында урып-җыю эшләре киң колач белән бара, бөртекләрне түкми-чәчми басу кырлардан җыйнап алу өчен игенче-механизаторларыбыз аруны-талуны белми, көнне төнгә ялгап иген язмышын хәл итү өчен көрәшәләр. Без мәдәният хезмәткәрләре дә бу чорны читтән генә күзәтеп торырга күнекмәгән. Аларга рухи азык өләшү өчен, язын-көзен басу кырларга, игенчегә мәдхия җырларга ашыгып юлга кузгалабыз.
Шушы көннәрдә Ике басу Арташ мәдәният йорты каршында эшләүче “Фирүзә” агитбригадасы, китапханәче белән берлектә, “Нырты” хуҗалыгының урып-җыю, көзге чәчү барган басуларында “Арташ” бүлекчәсенең ындыр табагында булып “Игенчегә игелек кылучыга, җырлар аша сәлам юллыйбыз” дигән программа белән чыгыш ясадык. Шунысы куанычлы, басуларда барлык төр техникада да авылдашларыбыз эшли.
Кала дөньясына агылучы яшьләр арбасына утырмыйча, туган жирендә калган яшләребез дә бар. Авыл хуҗалыгы кадрлары әзерләүче югары уку йортларын тәмамлаган яшь белгечләребез – агроном Инсаф Мөхәрләмов, инженер Илүс Мөхәммәтҗанов, тагын берничә вазыйфаны бер үзе алып баручы уңган егетебез Данис Вәлиев шундыйлардан. Яшьләребезнең тәҗрибәле механизаторлар белән бергә алып барган күмәк тырышлыгы, хуҗалык рәисе Ильяс Илдус улы Дәүләтҗановның эшне дөрес оештыра белүе нәтиҗәсендә туган ягым кырлары мул уңыш белән сөендерә. Яшьләр булган җирдә киләчәк бар. Буш нигезләр кими, яшь сабыйлар дөньяга аваз сала, демографик хәл яхшыра! ”Фирүзә” агитбригадасы программасы туган җиребез язмышына битараф булмаган, балалар тәрбияли алган ата-аналарга да мактау җырлауны да үз эченә алган иде.
Раилә Мөхәммәтҗанова,
Ике басу Арташ мәдәният йорты мөдире.
Следите за самым важным и интересным в Telegram-каналеТатмедиа
Нет комментариев