Яшел ут “яшел елан” белән дус булучыларга янмый

Республикада, шул исәптән районыбызда 14  августтан спиртлы эчемлек  кулланган  хәлдә руль артына  утыручыларны  ачыклауга юнәлдерелгән “Аек йөртүче” оператив-профилактика чарасы  башланды. Автомобиль  йөртү һәм аракы  эчү – бер-берсе белән беркайчан  да үзара сыеша  алмый. Исерек кеше машина белән  идарә итсә, бәла-каза  китереп  чыгаручыга әйләнә. ЮХИДИнең  район  бүлекчәсе  хезмәткәрләре юл хәрәкәтендә  катнашучыларга аек булмаган   килеш руль  артына  утыруның аяныч нәтиҗәләргә  китерүен  аңлатачаклар, андый  вакытта иң  яхшысы – җәяү  йөрергә  киңәш итәчәкләр. Профилактика  чарасы  23  августка  кадәр дәвам итә.