РАЙОН ҮСЕШЕНӘ ҮЗ ИДЕЯЛӘРЕ БАР

Фәнил Мәүлетов, 18 декабрь 2019 - 11:04

762

Киләчәк хәзергә мәктәпләрдә белем алучы балаларга кала. Үсеп җиткәч, актив гражданлык позициясендә булсыннар өчен аларны җәмгыять тормышына яшьтән әзерләргә кирәк. Шул максаттан “Татарстан республика балалар оешмалары советы» иҗтимагый төбәк оешмасы тәкъдиме белән районнарда яшь гражданнар форумы уздырыла. Әлеге чарадан Саба яшьләре дә читтә калмады. Балалар иҗат үзәгендә үткәрелгән форумга 12 дән 18 яшькәчә булган иҗтимагый балалар оешмасы активистлары һәм лидерлары килде.

Форум булгач, төрле караштагы кешеләр нинди дә булса проблеманы хәл итәргә җыелган мәйданчык инде ул. Районның яшь гражданнары да шушы мөһим эшкә алынды. “Форумны ачык дип белдерәм. Сездән районның социаль-иҗтимагый үсешенә кагылышлы кыю фикерләр, матур идеяләр көтеп калабыз. Җәмәгать оешмалары эшчәнлегендә катнашудан тупланган тәҗрибәләрегезнең киләчәк тормышыгызда, һичшиксез, кирәге чыгачак,– диде аларга яшьләр эшләре һәм спорт бүлеге җитәкчесе Ирек Гарипов. Яшьләребез Сабаны ничек күрергә тели, аларга нәрсә җитми һәм биредә нәрсәне үзгәртер иде? Форумда катнашучылар шушы сорауларга җавап эзләде. Аларга “Татарстан республика балалар оешмалары советы» иҗтимагый төбәк оешмасы модераторлары булышты. Бер сәгать дигәндә балаларның мәдәният, яшүсмерләрнең иҗади үсеше, сәламәт яшәү рәвеше, спорт һәм туризм проблемалары турында фикер алышуы, эшмәкәрлектә беренче адымнар, укучыларның массакүләм мәгълүмат чаралары, экологик, патриотик тәрбия, яшьләрне хокукый һәм социаль яклау, волонтерлык эшчәнлеге, мәгариф һәм фән турында сөйләшүе тәмамланды. “Бирегә Саба районының киләчәк тарихын язачак яшьләр җыелган. Презентацияләргә карап, бу уңайдан тәкъдимнәрегезнең әһәмиятле икәнлегенә төшенәбез. Сез биргән идеяләр әле ул эшнең яртысы гына. Ә менә аларны тормышка ашырырга алыну, моның өчен җаваплылык тою – икенче мәсьәлә. Сез моңа әзер дип уйлыйм”, – диде республика балалар оешмасы советы аппараты җитәкчесе Марина Токинова...