Һәлакәткә анализ ясалды

Шушы  көннәрдә  башкарма комитет җитәкчесе Марат Ишниязов рәислегендә Саба  муниципаль районының юл хәрәкәте  иминлеге комиссиясенең  чираттан тыш  утырышы булды. Анда  агымдагы   елның 22 мартында Казан-Шәмәрдән автомобиль юлының 115 километр +680  метрында булган транспорт һәлакәтенә  анализ  ясалды.  Дәүләт автоинспекциясенең Саба районы  бүлекчәсе  начальнигы  Марат Гаязов  чыгышыннан   күренгәнчә, “ВАЗ-21150”дә Шәмәрдән  ягыннан  торак пунктны  урап  узучы юл юнәлешенә таба баручы Д.Р.Ибраһимов беренче булып хәрәкәт итү хокукына ия машинага юл бирми һәм аңа килеп бәрелә. Нәтиҗәдә “ВАЗ-21150”не йөртүче 2003 елгы егет алган тән җәрәхәтләреннән Саба үзәк хастаханәсендә үлә.

Һәлакәт  көннең  якты  вакытында төбәк әһәмиятендәге юлда, хәрәкәт көйләнелми торган чатта  килеп  чыга. Йөрү өлешенә өзек-өзек горизонталь юл тамгасы сызылган,  асфальтта тишек-тошыклар   күренми. Шул  ук  урында агымдагы елның 19 мар­тында да юл-транспорт вакыйгасы тер­кәлгән. “Форд-Фокус”  автомоби­лен   йөртүче 1982  елгы  Ш. чат­ны  узганда төп юлдан баручы чит ил машинасына  юл бирми. Бәрелешү авариягә  гаепле йөр­түченең һәм аның 1994 елгы  пассажирының   авыр хәлдә Арча үзәк хастаханәсенә озатылуы белән төгәлләнә. Әлеге участокка хәрәкәтне  автомат рәвештә теркәүче күчмә  комплекслар куелмый. Якын стационар  комплекс 320 метр ераклыкта  урнаштырыла.

2024  елда  әлеге юлны баланста тотучы “ГлавТатДорСтрой” дәүләт  казна  учреждениесенә чатка  светофор  объекты урнаштыру турында информацион хат җибәрелгән.

Комиссия материалларыннан кү­­ренгәнчә, 22 мартта булган һә­лакәттә гаеплелеккә ахыргы нокта  тикшерү  чаралары  үт­кәрелгәннән  соң куелачак. Утырышта Шә­мәрдәнне  урап  узу  чатына светофор комплексы урнаштыру буенча “ГлавТатДорСтрой”га мөрәҗәгать җи­бәрү турында  карар  чыгарылды.  Баш автоинспектор Марат Гаязовка административ хокук бозуларны автоматлаштырылган теркәү үзәге  аша  чатка авторадар  комплексы  кую мәсьәләсен  хәл итәргә тәкъдим ителде.