Күп балалы гаиләләргә ипотека кредитын каплауга түләүләрне арттырырга тәкъдим итәләр

Бу хакта ТАСС агентлыгына РФ Иҗтимагый палатасының демография, гаиләне, балаларны һәм традицион гаилә кыйммәтләрен яклау комиссиясе рәисе Сергей Рыбальченко белдерде.

2019 елдан алып дәүләт ярдәме суммасы 450 мең сум тәшкил итә һәм ул үзгәрешсез кала.

«Без өченче бала тугач ипотека кредитын түләүгә бирелә торган субсидияләрнең индексацияләнмәве белән бәйле вазгыятьне яңадан карарга тиеш, ул 2019 елдан шул ук дәрәҗәдә кала – 450 мең сум. Әйе, кайбер төбәкләрдә ул 1 миллион сумга кадәр арттырылган, әмма индексация башкарылмый», – дип билгеләде Рыбальченко.

Аның сүзләренчә, туучылар саны аз булган төбәкләрдә, шулай ук Ерак Көнчыгышта ярдәмне арттыру аеруча мөһим. Анда, аның фикеренчә, түләүләр 1 млн сум тәшкил итәргә тиеш.

Тулырак: https://tatar-inform.tatar/news/kup-balaly-gailalarga-ipoteka-kredityn-kaplauga-tulaularne-arttyryrga-takdim-italar-5909965