“Әй, Сәлимчик, әйдә, киттек домой... наверное өйдә, заждались”

Күзәтүләр....

Шәһәр ишек алды, мәйданчыкта

Матур уен тапкан бер бала.

Ак икмәкне футбол итеп уйный

Тибеп туйгач, туктап тын ала.

Янәшәдә әнисе утыра,

Затлы телефоннан    сөйләшә.

Ә аннары сәгатенә карап,

Малаена болай эндәшә:

“Әй, Сәлимчик, әйдә, киттек домой,

Наверное өйдә, заждались”.

Ә улының һич керәсе килми,

Матур уенчыгы алда ич.

Китте болар икәү йортка таба,

Миңа калды карап каласы.

Маңкорт ана атлый, ә артыннан

Таш бәгырьле асфальт баласы.

Бәндәләрнең асыл сыйфатлары

Кылган гамәленнән беленә.

Кеше булып калыйк кардәшләрем,

Типкәләми икмәк. Телне дә....

Ринат Сафиуллин,

Яңа Мичән. 

Без социаль челтәрләрдә: Телеграм, ВКонтакте, ТикТок, Ютуб, Одноклассники, Твиттер, Яндекс.Дзен