Фунчозалы салат

Кирәк:

* 100 г фунчоза;
* 200 г пешкән тавык түше;
* 1 данә кызыл борыч;
* 1 данә кыяр;
* 1 данә кишер;
* 1 тырнак сарымсак;
* петрушка, яшел суган кыягы;
* 1 аш кашыгы соя соусы;
* 1 кап «Корейский соус» дигән тәмләткеч («Баллы чили соусы» да ярый);
* үсемлек мае;
* тәменчә тоз-борыч.
 

Эш барышы:

Фунчозаны 10 минутка кайнар суга салып куябыз.
Кишерне махсус угычтан токмачлап уабыз.
Кыяр белән борычны саламлап турыйбыз.
Пешкән тавык түшен шулай ук озынча итеп турарга кирәк.
Сарымсакны чистартып, ваклыйбыз.
Фунчозаны тишекле чүмечкә салып, суын саркытабыз. Ул артык озын булганга, ашавы кыенрак.
Шуңа күрә аны кайчы яки пычак белән кыскарак өлешләргә кисәбез.
 Зур салат савытына яшелчәләрне, ит, фунчозаны салабыз, сарымсакны өстибез.
 Салатка соя соусы белән Корея соусын һәм үсемлек маен салабыз. Тәменчә генә тоз белән борыч өстибез. Барысын бергә болгатабыз да яшел салат яфраклары түшәлгән зур тәлинкә уртасына өеп, өстен яшел үләннәр белән бизәп, табынга чыгарабыз.

http://syuyumbike.ru