Казанда ике автомобильне бәрдергән чит ил машинасы шоферы качып киткән

Казанда чит ил машинасы ике автомобильне бәрдергән һәм гаражга барып кергән, шуннан соң шофер качып киткән. Бу хакта «Татар-информ»га шәһәр автоинспекциясендә хәбәр иттеләр.

Агентлыкка мәгълүм булганча, бүген иртәнге сәгать биштә Казанның Салмачы бистәсе Үзәк урамында «Хендэ» шоферы «Рено» һәм «Тойота»ны бәрдергән.

Шаһитлар сүзләренә караганда, югары тизлек белән килгән «Хендэ» автомобиле борылышта борыла алмыйча туктап торган машина түбәсеннән очып узып, шәхси йорт гаражына барып төшә.

Машина йөртүче һәлакәт урыныннан качып киткән.

Юл транспорт һәлакәте урыныннан фото һәм видеоны социаль челтәрләргә шаһитлар куйган.

Чыганак: tatar-inform.tatar