Грипптан алдан сакланыгыз

Гриппны китереп чыгаручы вирусларның А и В типлары тиз үрчүе һәм агрессивлыгы белән аерыла. Йогышланганнан соң санаулы сәгатьләр эчендә ул тын юлларының лайлалы тышчасын зарарлый һәм микроблар үтеп керү өчен шартлар тудыра. Грипп вакытында бактериаль катлауланулар шуның белән аңлатыла. Грипп белән авырганда башкаларны йогышламас өчен өйдә генә торырга, вакытында дәвалану өчен табибка мөрәҗәгать итәргә кирәк. Үз-үзеңне дәвалау белән шөгыльләнмәскә! Табиб кушканнарны төгәл үтәү мөһим. Авырган балаларны бакчага, мәктәпкә, мәдәни чараларга җибәрергә ярамый. Авыру янында булганда медицина битлеге кияргә һәм аны сәгать саен алыштырырга кирәк.

Вакцина – гриппка каршы иң нәтиҗәле профилактика чарасы. Прививканы халыкның барлык категорияләренә дә кадатырга тәкъдим ителә. Ул балалар һәм өлкәннәр, хроник авырулардан интегүчеләр, студентлар, мәгариф учреждениеләре, транспорт, сәүдә, көнкүреш хезмәтендәгеләр өчен аеруча мөһим. Вакцина ясау грипп кизүенә кадәр 3-4 атна алдан үткәрелә. Хәзерге вакциналар составына иммуномодуляторлар да (полиоксидоний яки совидон) кушылган. Прививка ясаткан 100 кешенең 90ы грипп белән авырмый. Чирләгән очракта ул өзлегүләрсез, җиңел формада үтә. Вакцина алганнан соң иммунитет 2-3 атнадан соң формалаша һәм бер елга кадәр саклана. Шуңа күрә прививканы ел саен ясатырга кирәк. Саклану чаралары балага узган хатыннар өчен дә йөклелекнең 2-3 триместрында бик әһәмиятле. Аларда грипп авыр формада үтә, хәтта яралгының үлеменә дә китерергә мөмкин. Моннан тыш йөкле вакытта прививка алу бала тугач та, аны беренче 6 айда авырудан саклый. Прививка алу өчен үзеңне участок табибына яки ФАП фельдшерына мөрәҗәгать итәргә кирәк.

Резеда Фәттахова,

район үзәк хастаханәсенең эпидемиология мәсьәләләре буенча урынбасары.