Фәрит Мөхәммәтшин: Мәктәпләр тәрбия функциясенә дә игътибар итәргә тиеш

Татарстан мәктәпләре укучылар белән эшләгәндә белем бирүгә генә түгел, тәрбия функциясенә дә игътибар итәргә тиеш. Бу хакта бүген ТР Дәүләт Советы Рәисе Фәрит Мөхәммәтшин Казанда «Сугыш хатын-кыз йөзле була алмый...» республика социаль-гуманитар проектын тәкъдим итүдә әйтте. Әлеге проект республикада Җиңүнең 75 еллыгын бәйрәм итү кысаларында гамәлгә ашырылачак.

«Җәмгыятьтә мәгариф учреждениеләре эшчәнлеге үзгәрде. Барлык игътибар белем бирү функциясенә бирелә, ә мәктәпләрдә, гаиләдәге кебек үк, тәрбия бирү дә булырга тиеш. Без үзебезнең балаларыбызны халкыбызның иң яхшы традицияләрен күрсәтү һәм Бөек Ватан сугышы турында дөреслекне сөйләү өчен шунда бирәбез. Бу функция тулысынча эшли башларга тиеш. Гаилә һәм ата-аналар гына бу бушлыкны тулыландыра дип уйлау гына җитми. Шуңа күрә Россия Президенты сыйныф җитәкчелегенә игътибар итте һәм укытучыларга сыйныф җитәкчелеге өчен өстәмә түләү турында тәкъдим кертте», — диде Мөхәммәтшин.

«Гомумән алганда, Татарстан шактый уңышлы үсеш ала, дип әйтәсем килә. Без сезгә, ветераннар, яхшы икътисади база калдыруыгыз өчен рәхмәтле», — дип сөйләде ТР Дәүләт Советы Рәисе.

«Сугыш хатын-кыз йөзле була алмый...» проекты Бөек Ватан сугышында Җиңүнең 75 еллыгына багышланган. Проектның төп максаты — хатын-кызларның героик үткәнен — Бөек Ватан сугышында катнашкан хатын-кызлар, тыл хезмәтчәннәре, сугыш балалары турындагы истәлекләрне саклап калу. Зур проект 2020 елның 1 февраленнән 2021 елның 2 октябренә кадәр өч этапта гамәлгә ашырылачак. Сугыш елларында хатын-кызларның батырлыгы турындагы истәлекләрне саклап калуга юнәлтелгән чаралар узачак.

Яңа социаль проектны «Мәрхәмәт-Милосердие» хатын-кыз депутатлар берләшмәсе оештыра. Проект ведомствоара булып тора, аңа бик күп партнерлар кушылды, һәр министрлык җәлеп ителде. Аның кысаларында чаралар республиканың барлык муниципалитетларында узачак.

Фото: архив/Рамиль Гали

Чыганак: tatar-inform.tatar