Казанда рәссам Роберт Гайсинның 60 яшьлегенә юбилей күргәзмәсе ачыла

(Казан, 10 ноябрь, «Татар-информ»). 16 ноябрьдә Казанның «Хәзинә» Милли сәнгать галереясендә рәссам Роберт Гайсинның юбилей күргәзмәсе ачыла, дип хәбәр итә Татарстан Сынлы сәнгать музее матбугат хезмәте.

Рәссам 1957 елның 4 декабрендә Татарстанның Лениногорск районы Керкәле авылында туган. V сыйныфтан Казан дәүләт консерваториясе каршындагы урта махсус музыка мәктәбендә кларнет классы буенча белем ала. Н.И.Фешин исемендәге Казан сәнгать училищесын, Чуаш дәүләт педагогика институтының сәнгать-графика факультетын тәмамлый. Россия (2000) һәм Татарстан (1997) Рәссамнар берлекләре әгъзасы. Күп еллар укытучылык эшчәнлеге белән шөгыльләнә.

Роберт Гайсинның эшләре Мәскәү, Истанбул, Әнкара шәһәрләрендә оештырылган күргәзмәләрдә тәкъдим ителгән. 1999 елда рәссам «Тюрксой-II» Халыкара иҗат лабораториясендә (Бурса шәһәре, Төркия), 2006 елда «Кочующие свитки "Хабар"» проектында катнаша. Аның эшләре ТР Дәүләт сынлы сәнгать музеенда, шулай ук Россия һәм дөньядагы күп кенә шәхси һәм корпоратив җыелмаларда саклана.

Күргәзмә 12 декабрьгә кадәр дәвам итәчәк. Анда 40тан артык картина белән танышырга мөмкин.

http://tatar-inform.tatar