Муса Җәлил оныкчыклары Мәскәүдә хәйрия концертында чыгыш ясаячак

Мәскәүдә Муса Җәлил оныкчыклары хәйрия концертында чыгыш ясаячак. 16 майда Татарстанның Россиядәге Вәкаләтле вәкиллеге Мәскәүнең «Яңа Опера» театрында Фуат Мансуров исемендәге V Россия һәм БДБ илләре яшьләре музыка фестиваленең гала-концертын үткәрә. Бу хакта Татарстанның Россиядәге Вәкаләтле вәкиллеге матбугат хезмәте хәбәр итә.

Концерт ике юбилей датасы: Россия, Татарстан һәм Казахстанның халык артисты Фуат Мансуровның тууына – 90 ел, Казанның Анжела Вавилова исемендәге Хәйрия фонды оешуга 12 ел тулуга багышлана.

Концертта җыелган барлык акчалар онкология авыруларыннан интегүче балаларга ярдәм күрсәтү өчен А.Вавилова фондына күчереләчәк.

V фестиваль гала-концертында яшь талантлар, халыкара конкурслар лауреатлары, фестиваль кунаклары чыгыш ясаячак.

Концертта «Арт-Линия» Сәнгатькә ярдәм күрсәтү фондының яшь музыкантлары да катнаша, алар арасында Муса Җәлилнең оныкчыклары да бар. Фондның музыкаль программасына герой-шагыйрьнең оныкчыгы – Татьяна Малышева-Җәлил җитәкчелек итә.

Концертның кунаклары арасында Мәскәүнең «Яңа Опера» театры, Россиянең Зур театры солистлары, шул исәптән Россиянең атказанган, Татарстанның халык артисты Альбина Шаһиморатова да бар. Махсус кунак – скрипкачы Кодзи Моришита (Япония).

Фото: http://tatar-inform.ru

http://tatar-inform.tatar