Районда алты ай эчендә тизлекне арттыруның 9112 очрагы теркәлде

Һәркемгә мәгълүм, юл-транспорт һәлакәт­ләренең күпчелеге тизлек режимының сак­ланмавы аркасында килеп чыга. Районыбызда автомагистральләр юк, димәк, автомобильләрнең тизлеге 90 километр-сәгатьтән (+10 км/сәг.) артмас­ка тиеш. Шушы кагыйдә үтәлсә юлларда бәхетсезлек очраклары да бик күпкә азрак булыр иде. Ләкин, ни кызганыч, кагыйдә бозуларның зур күпчелеге «лихач»ларга туры килә. Агымдагы елның 6 аенда районыбыз юлларында ЮХИДИ инспекторлары тарафыннан һәм күчмә фоторадар комплексы (КРИС-П) ярдәмендә тизлекне арттыруның 9112 очрагы теркәлүе шул хакта сөйли. Бу узган елның шушы чоры күрсәткече белән чагыштырганда 263Зкә күбрәк һәм барлык төр юл хәрәкәте кагыйдәләрен бозуларның 74 процентын тәшкил итә.