Уллары Таһир авырып киткәч, гаиләдә бар дөньяның асты өскә килә

Кечкенә Таһир әти-әнисе белән җылы якка ялга барган җиреннән авырып кайта. “Лимфа төеннәренә салкын тигән. Бала авырый башлаган көн ялга туры килде. Таһирның күңеле болганды, ризыктан баш тартты, – дип сөйли әнисе Айгөл. – Дүшәмбе көнне республика балалар клиник хастаханәсенә юл тоттык. Табиблар тиз арада кан анализын алды. Онкологиягә бәйле тү­гелме икән дип тә тикшерделәр. Кан анализлары яхшы булмагач, сабыемның арка миенә пункция ясадылар. Шуннан соң төгәл диаг­ноз билгеле булды – улымда кан рагы икәне ачыкланды. Әле генә йөгереп йөргән, уйнаган са­быем шундый хәлгә калгач, бөтенләй өметсезлеккә бирелдем. Күзләремә карап ярдәм көт­кән улыма ни әйтергә дә бел­мәдем. Бу хакта белгәч, елаудан башым чыкмады. Бик авыр булды. Хәзер дә читен. Нишләргә дә белмим”.

 

Әлегә Таһир Казан хаста­ханәсендә дәвалана. Сабый үзен нишләткәннәрен дә аңлап җит­керми. “Улымда кан рагының авыр төре. Шуңа да химия те­рапиясенең иң көчлесен алабыз. 33 көн дигәндә, авыру бераз чи­генергә тиеш иде. Әмма Таһир­ның организмындагы рак кү­зәнәкләре кимеми, киресенчә арта гына. Хә­зерге вакытта донор эзлибез. Әгәр улыбызның хәле бераз гына яхшырып китсә, арка җелеген күчереп утырту кирәк булачак. Казан табиб­лары Мәскәүнекеләр белән элемтәдә тора. Киңәшләшеп эшли. Әмма донор кирәк. Аны чит илдән эзләп таптык, – ди Айгөл. – Химия курслары алып бетерүгә, безне чит илдә көтәләр. Анда барыр өчен 15 миллион сум акча кирәк. Бу хакта уйласам да, чәчләрем үрә тора. Башка сыймас сумма бит бу. Тик кул кушырып та утырып булмый. Мәрхәмәтле кеше­ләр барлыгына ышанам. Әнә шуңа да ярдәм сорарга булдым. Тамчыдан күл җыела, диләр. Күп әниләр мине аңлар дип уйлыйм. Бер могҗиза булыр, Аллаһы Тәгалә ярдәмен бирер, тиешле акчаны да җыярбыз дип яхшы уйлар уйларга тырышам. Улымны бер дә югалтасым килми бит!”

 

Ике яшьлек Таһир авыртуга түзәргә тырыша. Сабыйның өенә кайтасы килә икән. Тизрәк үзе­нең уенчыклары белән уйныйсы килә аның, ди әнисе. Бакчадагы дусларын да юксына. Әнә шул хыяллары тормышка ашсын өчен, баланың туганнары ярдәм өмет итә.

 

Билайн  89631583597

http://matbugat.ru

Гөлгенә ШИҺАПОВА