Юлда тәртип бозмыйлар

Һәлакәтләр күп очракта юллардагы җитеш­сезлек­ләргә, кагыйдәләр бозуга барып тоташа. Быелның ике аенда Татарстанда 291 юл-транспорт һәлакәте, 42 үлем очрагы теркәлгән. 736 кеше төрле дәрәҗәдәге имгәнүләр алган. ТР буенча ЭЭМның ЮХИДИ идарәсе башлыгы Ленар Габдрахманов хәбәр итүен­чә, республикада өч күрсәткеч буенча да кимү күзәтелә. “Әмма борчылырлык мәсьәләләр дә җитәрлек. Азнакай, Тукай, Нурлат һәм Чистай районнарында кире­сен­чә һәр күрсәткеч буенча да саннар югары. Ә Лениногорск һәм Түбән Кама районнарында һәлак булучылар саны арткан”, – дип сөйли ул.

Җәяүлеләр кичүе мәсь­әләсендә моңа кадәр дә сөй­ләшүләр алып барылды. Биг­рәк тә аларның тиешле таләп­ләргә туры китереп җитке­рел­мәве һаман да аптырашта калдыра. Республикада 6616 җәяүле кичүе­нең 20 процентын яңадан төзекләндерергә кирәк. Тиешле җиһазлар бе­лән идарә ителми торган юл кичүләрендә – 56, светофор куелганнарында 36 бәхет­сез­лек очрагы теркәлгән. Ике­сендә бергә 99 кеше имгәнү­ләр ала. Бигрәк тә балалар оеш­малары янәшә­сендә тиешле дәрәҗәдә каралмаган юл чатлары күп. Кисәтү бил­геләре яңа стандартларга туры китереп эшләнмәгән  яисә машина йөртүчегә бөтенләй күрен­ми торган җирләргә куелган.

Узган көз “Халык контроле” вәкилләре белән шундый урыннарны ачыклап йөр­гән идек. Бу хакта ЮХИДИ идарәсенә, Юл һәм транспорт министрлыгына, Казандагы район хакимия­тенә җит­­ке­рел­де. Күп оч­ракта кайбер мәсьәләләр кәгазьдә генә кала дигән шик тә бар. Юллардагы хәл­ләргә халык та битараф түгел. Хәзер тәртип­сезлекне шундук фотога тө­шереп, “Халык контроле”нә җибә­рергә мөмкин. Бу хакта Чаллыдагы эш сәфәре вакытында видеоконференция режимында ачыклык керт­кән Республи­каның кеше хокук­лары буенча вәкаләт­ле вә­киле Сәрия Сабурская чыгышында да күп фикер­ләр ишетелде. Ул һәр­бер мисалга аерым-ае­рым тукталды. Мө­рәҗәгать­ләр ара­сында юл­лар­ның начар хәлдә булуы, җәяүлеләр ки­чүендә, юлларда сызык­лар­ның булмавы турында Казан, Чистай, Лаеш, Яшел Үзәннән хәбәрләр күп алынган. Казан шәһәре буенча гына да юллардагы җитеш­сезлекләргә бәйле 3 меңгә якын мөрә­җәгать кабул ителгән. Алар­ның хәл ител­гәнме-юкмы икән­леген дә тикшерәчәк­ләр. Күбесе үтәү вакытын һаман кичектереп тора икән.

“Халык контроле” безнең эштә индикатор булып тора. Мөрәҗә­гатьләр­нең күбрәк кайсы урыннардан керүен ачыкларга ки­рәк. Бу безгә мәсьәләне яхшырак хәл итәргә ярдәм итәчәк”, – диде ТР Премьер-министры урынбасары – ТР Министр­лар Кабинеты аппараты җи­тәкчесе, Хөкүмәт комиссиясе рәисе урынбасары Шамил Гафаров. Ул бу мәсь­әлә уңаен­нан, быел бө­тен фи­нанс­лар­ны җәяү­леләр кичүе­нә юнәл­тү яхшырак булмасмы дип,  уйланырга киңәш итте.

Вакытында эшләргә ки­рәк дигәннән, ел дәвамында һәр бакча баласының һәм мәктәп укучысының кие­мен­дәме, букча-портфе­лен­дәме яктылыкны кайтаручы элементлар булырга тиеш дигән сөйләшү дә булган иде. ТР Президенты Рөс­тәм Миңне­ханов бу мәсьәләдә “Икенче сменада укучы баланың кие­мендә яктылыкны кайтаручы эле­ментларның булуы мәҗ­бүри”, – дип әйткән иде. Әле­ге элементлар 1 сыйныфка баручы укучыларга бү­ләк ител­гән букчаларга да салынды, Президент­ның Чыршы бәй­рәменә ки­лүче укучыларга да таратылды. Тик әйт­кәннәр сүздә калдымы, юл аша чыкканда да, мәктәп яныннан  үткәндә дә кагыйдә буенча йөрүчеләр генә кү­рен­мәде. Мәгариф министры урынбасары Лариса Сулима­ның бу мәсьәлә буенча май аенда җыелышып сөйләшү булачак, дигән фикеренә каршы, Хөкүмәт комиссиясе рәи­се урынба­сарының: “Май­да соң була, аны февраль башында ук үткәрергә кирәк иде”, – дигән сүз­ләрендә дә хак­лык бар. Һәр чирек башында, һәр уку елы башында бу мәсьәләгә тагын бер әй­ләнеп кайтырга кирәк. Кабатлап торуның зыяны юк. Кү­бебез бу эшнең ничек алып барылганлыгын күрә­без. Ка­раң­гыда бернинди билгесез йөрүче балалар күп булды, мәктәпләрдә бу хакта бер кат әйттеләр дә, шуның белән вәссәлам.

http://vatantat.ru