Сораулары җитди, җаваплар уңай
Кичә районда эшмәкәрләрне Татарстан Республикасы Президенты ярдәмчесе – Татарстан Республикасы Президенты каршындагы Эшкуарлар хокукларын яклау буенча вәкаләтле вәкил Фәрит Габделганиев кабул итте. Аңа үзенең сорауларын җиткерергә 6 эшмәкәр язылган иде. “ЕвроАкцент” җәмгыяте директоры Сергей Красавин озак срокка ташламалы займ яки субсидия алу мәсьәләсе белән мөрәҗәгать итте.
“ЕвроАкцент” сәнәгать мәйданчыганда резидентлар өчен каралган җитештерү мәйданчыгы төзергә җыена. Хөкүмәт андый эшмәкәрләргә булышлык итү мөмкинлеген күздә тоткан. Хәзерге вакытта Министрлар Кабинетының махсус программасы әзерләнгән. Җәмгыять җитәкчесенә Татарстан Республика эшмәкәрлеккә булышлык итү фонды аша “Төзелеш” программасы буенча парклар, сәнәгать мәйданчыклары биләмәсендә инженерлык инфраструктурасы, модуль биналар төзүгә 30 миллион сумга кадәр субсидия алу мөмкинлеге турында аңлатылды.
“Гафель” компаниясе хуҗасы Алим Галимуллин Лесхозда аспирантларга фәнни эшләр алып бару өчен биоинженерия кластеры булдыру идеясен ачып салды. Аңа бирелгән җаваптан күренгәнчә, быел җәй аенда Урман хуҗалыгы министрлыгында Татарстанда урман биотехнологиясе буенча фәнни кластер булдыру мәсьәләсенә кагылышлы киңәшмә үткәрелгән. Хәзер аның нигезләмәсе эшләнгән һәм структурасы булдырылган. Инде кластерда катнашучылар ачыкланырга һәм аның проекты эшләнергә тиеш. Урман хуҗалыгында биоинженерия кластеры булдыру IT кластерны үстерү стратегиясен эшләү зарури. Алим галимуллин соравы буенча Урман хуҗалыгы министрлыгына запрос биреләчәк.
Кабул ителүдә катнашучыларның сорауларына җавап бирүдә “Эшмәкәрлеккә булышлык итү фонды” микрокредит компаниясе генераль директоры Айдар Салихов, Икътисад, Дәүләт идарәсен цифрлы нигездә үстерү, мәгълүмат технологияләре һәм элемтә, Авыл хуҗалыгы һәм азык-төлек идарәсе министрлыклары вәкилләре катнашты.
“Кабул ителүдә булган эшмәкәрләрнең барысын да алга таба үсеш, эшчәнлекне тагын да киңәйтү мәсьәләсе кызыксындыра. “Стартап” программасына кагылышлы сораулар булды. Кызганычка каршы, финанслар җитмәве аркасында әлеге программа вакытлыча туктатылган иде. Әмма кичә генә Россия Федерациясе Премьер-министры Михаил Мишустин вице-премьерлар белән киңәшмә үткәреп, аграрийларга булышлык итү программасының тагын бер елга озайтылачагын белдерде. Ягъни 2020 елда аларга тагын 13 миллиард сум күләмендә грант биреләчәк. Бу акча эш башлаучы фермерлар өчен дә көтеп алынган ярдәм булачак. Кабул итү йомгакларыннан чыгып, хәзер актлар залында эшмәкәрләр белән лекция форматында пандемия шартларында үзеңне тоту мәсьәләләренә багышланган очрашу үтә. Бизнес өчен монысы да мөһим”,– диде Фәрит Габделганиев журналистлар белән әңгәмәсендә. Гомумән алганда эшмәкәрләрнең кабул итүдә биргән сорауларының уңай хәл ителүе район икътисадында чагылыш табачак.
Автор фотолары
Следите за самым важным и интересным в Telegram-каналеТатмедиа
Нет комментариев