Тимердән бизәк ясаучылар

Һәр ко­рылмага, җи­теш­терү цехы булсын­мы ул, социаль бина­мы, төзүченең кү­ңел җылысы салынган. Һәр төзелеш объекты күпләгән һөнәр ияләре тырышлыгы белән югары күтәрелә. Эретеп ябыштыручылар төзү мәйданчыгына беренчеләрдән булып килә һәм аларның хезмәте белән нигез­дә төгәлләнә дә. Тө­зүчеләр көне уңаен­нан 159нчы ПМКда әлеге һөнәр ияләре Фаяз Заһидуллин һәм Рәис Мәүлин белән сөй­ләштек. Икесе дә эретеп ябыштырырга үзлегеннән өй­рәнгән һәм алар янында һөнәр таныклыгы булганнар бер читтә торсын. “Мин 1989 елда эшкә килгәндә ПМКда 300ләп кеше бар иде (дөрес, аны соңыннан оешма җитәкчесе Фәргать Нәбиуллин төзәтте: 1989 елда 175 кеше эшләгән). Башта бетончы булдым. “Т-150”тракторында да, аккумулятор, токарь цехында да эшләдем. Хәзер төп коралым – эретеп ябыштыру агрегаты. Утыз ел эчен­дә күп эшләнгән. Мәктәпләр, балалар бакчалары һәм башка биналар яныннан үт­кән­дә, монда минем дә хезмәт кергән дип куанам. ПМК – минем икенче йортым булып әверелде. Хезмәтемнән тәм табам, яшәү мәгънәсе алам”,– ди Фаяз За­һидуллин.

Рәис Мәүлин (фотода уңда)исә баш­та райпода машина йөрткән. ПМКдан ерак тормагач, металлдан төрле әйберләр ясаучыларның эшен гел кү­зәтеп йөргән. “Аларның хез­мәтенә кызыгып, үземне шу­шы һөнәрдә сынап карарга булдым. Эре­теп ябыштыру – ике тимерне ялгау гына түгел. Без бит тимердән бизәкләр дә ясыйбыз. Бөгәргә – көч, тигез чыгарырга осталык кирәк. Инде эшли башлаганга 6 ел булды. Үземне шушы хезмәттән баш­ка күз алдыма ки­терә алмыйм”,– ди оста. Җитәкчеләре Фәр­гать Нәбиуллин әйтүенчә, алар ясаган тимер әйберләргә сорау зур икән. Заказлар булып тора. Кешеләр капка-коймаларны да, шулай ук мәңгелек йортлардагы туган­на­­рының чардуганнарын да яңарта. “Үл­гәннәрнең каберен бе­лергә ки­рәк, әлбәттә. Исән­нәр­гә авыртмаска, сә­ла­мәт булырга язсын. Сау булсаң, хез­мәт бара. Кайда да эшләргә кирәк. Эштә телефон белән уйнап утырганны, сәгать саен тәмәке тартучыны беркем дә яратмый”, – диләр эретеп ябыштыру осталары.

Автор фотосы