Ләйләгә нинди карар чыгардылар? (Фотолар)

Гаепләнүче — март аенда «Идел» журналында шигырьләрен бастырып чыгарган, инде шактый танылу алган Ләйлә Хәбибуллина иде.

Суд эше бик кызу барды. Мәхкәмә сәркәтип — Гөлүсә Закирова эшне ачып җибәрде. Казый эшен Рабит абый Батуллага ышанып тапшырдылар. Гаепләүче Рифә апа Рахман һәм гаепләүче ягыннан шаһит Луиза Янсуар иде.

Рифә апа Рахмән Ләйләнең иҗатын бик кырыс итеп, иронияле итеп тәнкыйтьләгән булса, Луиза Янсуар эшне тиз тотарга, йомшак кына җитешмәгән якларны күрсәтергә тырышты. Хәер, Ләйләнең иҗатында алар бик күп булып чыкмады. Иң кызыгы, яклаучылар Әлфәт абый Закирҗанов һәм яклаучы ягыннан шаһит Галимҗан Гыйльмановларның фикерен ишетү булды. Алар гаепләнүчеле ялкынланып якладылар.

Башта казый «Ләйләнең иҗаты татар әдәбиятына шактый өлеш кертә, шуңа күрә аны аклыйбыз» — дип карар чыгарган булса да, аңа үзгәртүләр кертергә туры килде. «Ләйләнең иҗаты татар әдәбиятына шактый зур өлеш кертергә мөмкин! Шуңа күрә аны акларга була» — дип төзәттеләр.

Хәбибуллина Ләйлә  үзе Әдәби суд турында менә нәрсә ди:

«Әдәби суд алдыннан ничек булыр, нәрсә әйтерләр икән дип, мин бик борчылган идем. Әмма бу юкка булган. Утырыш бик җиңел, күтәренке рухта үтте. Мин һәрбер сүзне игътибар белән тыңлап, анализлап, ярый әле катнашырга ризалашканмын, дип утырдым. Мондый иҗат лабораториясе, тәнкыйть утырышы аша һәр яшь язучыга үтәргә кирәк, минемчә. Монда яңгыраган һәр фикер файдага гына, үзеңнең иҗатыңа икенче төрле күзлектән, җитдирәк карый башлыйсың. Мондый әдәби судлар ешрак булсын һәм ул яшьләрнең иҗатын үстерсен иде.»

Чарадан соң бөтен кеше бик теләп фотога төште, һәм казый белән селфи ясады.

Фото: http://idel-tat.ru

http://idel-tat.ru