Фото: © «Татар-информ», Рамил Гали

«Идел» журналисты Рәфидә Галимҗанова «Татар-информ»да узган матбугат очрашуында Республикакүләм ифтарда волонтер булып катнашуын искәртеп узды һәм үзләренә тиешле күләмнән артыграк ризыкны алып китүчеләр барлыгын әйтте.

«Бу проблеманы хәл итәргә тырышабыз. Мөхтәсибләр аша, мөфтияттән: «Мәчетләрдә имам-хатыйблар шуның өстендә эшләсеннәр, абыстайлар бу сүзне җиткерсеннәр иде», - дип әйтәбез. Шуның өчен зур чаралар булганда өстәл янында җыелганда үз-үзеңне тотышыңны, тәрбия мәсьәләсен абыстайлар аша җиткермәкче булабыз. Шунлыктан, чакыру билетларын мәчетләр аркылы таратабыз да. Алар үз мәхәлләләре белән килсә, мондый күренешләр сирәк булыр, дип өметләнәбез», - дип җавап бирде Ирек Арсланов.

«Болгар радиосы» журналисты Люция Шәрәфиева узган ел шушы күренешне видеоларга төшереп, социаль челтәрләргә урнаштыручылар барлыгын әйтте. «Бер яктан, кешеләр ризыкларны тутырып алып чыгалар дип, гаепләп әйттеләр. Икенче яктан, ул безнең – мөселманнарның ифтарны ямьсезләү күренеше кебек кабул ителә. Социаль челтәрләргә видео язмалар куйганда саграк булырга, үзебезгә гаеп ташламаска иде», - дип тәкъдим итте ул.

«Туган авылым» милли-туристик комплексны хуҗасы Радик Абдрахманов әйтүенчә, һәр кешегә ланч боксны үзе белән алып китү мөмкинлеге бар. «Моннан тыш, без әле пакет та таратабыз. Туклану культурасын онытмасыннар иде. Өстәлдә булган ризыкларны ашый башлаганчыга яки ашап бетергәнчегә кадәр алып китмәсеннәр иде. Ифтардан соң өстәлдә калган ризыкны үзең белән алып китәргә рөхсәт ителә. Ифтарга килүчеләр үзләрен этикет таләпләренә туры китереп тотса иде», - диде ул.

• Республикакүләм ифтарда катнашучылар, 18:17 сәгатьтә, ахшам намазы вакыты керү белән, Татарстан мөфтие Камил хәзрәт Сәмигуллин җитәкчелегендә җәмәгать белән намаз укыячак һәм ифтар залына узачак.
• Республикакүләм ифтар 2013 елдан бирле ел саен Татарстан Республикасы мөселманнары Диния нәзарәте, «Ак Барс Арена» стадионы дирекциясе һәм «Туган авылым» милли-туристлык комплексы көче белән оештырыла. 2021 елдан бирле ул «Казан Экспо» халыкара күргәзмәләр үзәгендә уза.

Тулырак: https://tatar-inform.tatar/news/respublikakulam-iftarda-tiesle-kulamnan-artygrak-rizykny-alyp-kitucelarne-kisattelar-5884919