Россиягә Белоруссиядән алма һәм груша кертүне тыйдылар

Россия авыл хуҗалыгы күзәтчелеге 12 апрельдән Белоруссиядән алма һәм груша кертүне тыя. Чөнки Белоруссия үз продукциясе сыйфатында Россиягә азык-төлек санкцияләре кертелгән илләрдән продукция кертә ала, дип искәртә күзәтчелек хезмәте. Бу хакта Россия авыл хуҗалыгы күзәтчелеге федераль хезмәте җитәкчесе Сергей Данквертка сылтама белән “Интерфакс” хәбәр итә.

Сергей Данкверт сүзләренчә, 1 апрельдән 7 апрельгә кадәр Россия чигендә шундый продукция төялгән документларсыз 36 машина тоткарланган. Ул җиләк-җимешләрне законсыз кертергә омтылуларын әйткән.

Моннан тыш, Белоруссиянең фитосанитария хезмәте белорусларның җиләк-җимешләре дип сертификацияләгән алма һәм груша белән 66 машина тоткарланган. Әмма, Данкверт искә төшергәнчә, узган ел "белорус хезмәттәшләре безгә үзебезнең алма һәм грушаның февраль аенда ук тәмамлануын белдергән иде".
 

Фото: архив tatar-inform

https://tatar-inform.tatar