Рөстәм Миңнеханов Саба мәгариф идарәсенә яңа машина тапшырды

«Яңа уку елы алдыннан күркәм бер гадәт бар – бүләк тапшыру. Мәгариф системасы муниципалитетлар һәм шәһәр округларының Мәгариф бүлекләренә таяна. Әлбәттә, сезнең мобильлек һәм эшегезнең нәтиҗәлелеге күп яктан транспортның булуына бәйле, ул тагын да оперативрак эшләргә мөмкинлек бирәчәк», - диде Миңнеханов.

Педагогларның 2017 елда узган август киңәшмәсе кысаларында муниципаль районнарның Мәгариф идарәләренә 49 LADA Largus автомобиле тапшырылган иде. Интенсив файдалану нәтиҗәсендә алар инде үз ресурсларын сарыф итеп бетерде. Шуңа бәйле рәвештә, Татарстан мәгариф һәм фән министры Илсур Һадиуллин республика җитәкчелегенә машиналар паркын яңарту үтенече белән мөрәҗәгать итте.

«Заманалар авыр, керемнәр, чыганаклар белән дә хәл катлаулы. Әмма төп проблема – машинаның мондый моделе чикле булуында иде. Мәскәүдә якташларыбыз эшли, кирәк чагында алар безгә ярдәм итә», - дип искәртте ТР Рәисе.

Тантана ахырында ул педагогик хезмәткәрләрне яңа уку елы белән котлады. «Без бүген үз эшебезнең нәтиҗәләрен күрмибездер, мөгаен. Әмма республикабызның киләчәге – үсеп килүче буын өчен нәрсә дә булса эшли алуыбызда», - дип белдерде Миңнеханов.

Шушы сүзләрдән соң республика җитәкчесе мәгариф һәм фән министрына автомобильләргә символик ачкыч тапшырды. Күңелле миссиядә Саба муниципаль районы башлыгы Рәис Миңнеханов, район мәгариф бүлеге начальнигы Илфат Шакиров катнашты.

фотолар Татарстан Республика Рәисенең Матбугат хезмәтеннән алынды

Тулырак: https://tatar-inform.tatar/news/rostam-minnexanov-raion-magarif-idaralare-baslyklaryna-yana-masinalar-tapsyrdy-5875040