Каләмдәшебез Фәридә Вилданованың тәүге китабы дөнья күрде

Илмира Галимуллина, 10 февраль 2026, 14:17

605

Шушы көннәрдә 50 яшьлек гомер бәйрәмен билгеләп үткән Фәридә Фәрит кызының тормышында тагын бер күңелле вакыйга булды- аның беренче - «Язмыш бизмәне» дигән китабы дөнья күрде.

❮ ❯

Каләмдәшебез Фәридә Вилданованың тәүге китабы дөнья күрде

Фәридә Вилданованың әлеге китабында гыйбрәтле вакыйга- язмышлар тасвирланган “Язмыш бизмәне” дип аталган повесте урын алган. Биредә кеше һәм җәмгыять, ата-ана һәм бала, ир белән хатын мөнәсәбәтләре, тормышның бормалы бусагалары, кеше яшәешенең максаты турында фәлсәфи уйланулар, бәхетсез мәхәббәт сурәтләнгән. Автор әсәрдә тормышта ялгыш адымнар ясаудан саклану, үзеңнең үтелгән гомер юлыңа нәтиҗәләр ясарга өйрәнү, сайлаган кыйблаңнан тайпылмау һәм башка шундый кешелек кыйммәтләрен төрле геройларның язмышлары һәм аларның хис-кичерешләре аша ачып бирә.
Китап киң даирә укучыларга тәкъдим ителә. Кызыксынучылар өчен бу китап безнең редакциядә бар.

Фәридә Фәрит кызын яңа иҗат җимеше белән котлыйбыз! Укучыларыгыз күп булсын, сау-сәламәт булып, илһамланып яңа әсәрләр иҗат итәргә язсын!

Фәридә Фәрит кызы Вилданова 1976 елның 2 февралендә Теләче районы Олы Саурыш авылында дөньяга килә. Олы Мишә урта мәктәбен тәмамлагач, Казан Дәүләт университетының (КФУ) журналистика һәм социалогия факультетында белем ала. Иҗади хезмәт юлын 1998 елда “Теләче хәбәрләре” газетасында башлый. 2004 елдан бүгенгәчә “Саба таңнары” газетасы редакциясендә журналист булып эшли. Озак еллар район тормышын, аның яшәешен, тырыш халкын чагылдырган күп санлы мәкаләләр язу белән беррәттән, үзен әдәбиятның төрле жанрларында да сынап карарга омтыла. “Язмыш бизмәне” китабы –авторның тәүге чәчмә әсәре. Фәридә Вилданова шулай ук күңел түрендәге хисләрен каләменә манып, шигырьләр дә иҗат итә.