Сабада фән олимпиадасы җиңүчеләрен хөрмәтләделәр
Бу уку елында фән олимпиадаларында барлыгы 188 урын алынды
26 май көнне “Россиянең ел укытучысы –2025” Бөтенроссия конкурсының муниципаль этабында җиңүче укытучылар һәм район, республика фән олимпиадаларында катнашып күркәм уңышларга ирешкән укучылар, аларның әти-әниләре хөрмәтләнде.
Районыбыз чын мәгънәсендә эзләнүчән, иҗади, алдынгы карашлы педагоглары, үзенең тирән белемле укучылары, фәнсөярләре белән горурлана ала. “Сабантуй” спорт-мәдәни үзәгендә район башлыгы Рәис Миңнеханов катнашында узган тантаналы чара үз эшенең осталары һәм сәләтлеләрнең һәрвакыт игътибар үзәгендә булуын тагын бер кат раслады.
“Һөнәри яктан үсештә булган укытучыларны һәм фән олимпиадаларында җиңгән тирән белемле укучыларны тәбрикләү традициягә керде. Быел аеруча истәлекле ел. Сиксән ел элек әби-бабайларыбыз бүгенге тыныч тормыш өчен тылда зур тырышлык куйганнар, Ватаныбыз азатлыгы өчен гомерләрен биргәннәр. Кылган батырлыкларын онытмыйча, алар үрнәгендә гел җиңү яулап яшәргә язсын. Нык сәламәтлек белән, бер-берегезне хөрмәтләп яшәвегезне телим. Сез булдырасыз!”, – диде үзенең тәбрикләү чыгышында Рәис Миңнеханов.
Иң элек сәхнәгә “Россиянең ел укытучысы – 2025”, педагогик хезмәт юлын башлап җибәргән яшь мөгаллимнәр арасында үтүче “Педагогик дебют”, “Ел тәрбиячесе – 2025” Бөтенроссия конкурсларының төрле номинацияләрендә җиңүгә ирешкән мөхтәрәм укытучылар, тәрбиячеләр чакырылып хөрмәтләнде. “Тарих һәм җәмгыять белеме дисциплиналарын иң яхшы укытучы” номинациясендә җиңүче булып танылган Олы Кибәче мәктәбе укытучысы Ләйсән Кәримова әлеге дәрәҗәле исемгә икенче тапкыр ирешә.
“Мәгарифтәге гомуми стажым 32 ел тәшкил итә. 2005 елда призер булган идем. 2020 елда һәм быел җиңүгә ирештем. Уңышларымның нигезе – әтием-әниемнән алган һөнәри белем хәзинәсе. Шулай ук җиңүләремнең асылын мәктәп тормышын кечкенәдән аңлап, авырлыкларын максатчан җиңә белергә өйрәнү, ә иң мөһиме – балаларны ярату, аларның һәр уңышына сөенү, киләчәгенә дөрес юнәлеш бирүдә дип уйлыйм”, – ди Ләйсән Рафил кызы.
Әлеге чара укытучыларның, укучыларның һәм әти-әниләрнең уртак тырышлык бәйрәме. Шушы теләктәшлек, бердәмлек һәм бергәлек матур нәтиҗәләргә китерә. Агымдагы уку елында Бөтенроссия фән олимпиадаларында барлыгы 188 урын алынса, шуның 7е Россия күләмендә яуланган. Мәсәлән, “Оникс” белем бирү үзәгенең IX сыйныф укучысы Ландыш Гайнетдинова республика этабында татар теленнән, региональ этапта экология, биология, инглиз теле фәннәреннән призер, дөнья сәнгате мәдәнияте фәненнән җиңүче булуга ирешкән. Шулай ук Бөтенроссия йомгаклау этабында дөнья сәнгате мәдәнияте фәненнән, “Путь к Олимпу” республика олимпиадасында инглиз теленнән призер, муниципаль этапта биология һәм татар теленнән җиңүче, экология фәненнән призер булган.
“Бик күп тырышырга, төннәр буе укып утырырга туры килсә дә, нәтиҗәләре куанычлы булды. Миңа аеруча инглиз теле җиңелдән бирелә. Моңа, әлбәттә, инглиз телендә каралган видеоларның да йогынтысы зур. Һәрбер җиңүнең нигезендә тырышлык, зур көч ята. Үземне киләчәктә медицина юнәлешендә күрәм”, – ди Ландыш.
Укытучылар арасында иң күп премия иясе булып быел да Саба урта мәктәбенең физик тәрбия укытучысы Ленар Вафин танылды.
«Олимпиада нәтиҗәләре буенча кулына 200 мең сумга якын премия ала. Аның артында нинди зур хезмәт ятканлыгы билгеле”, – диде Рәис Миңнеханов Ленар Ренат улын тәбрикләп.
Ул агымдагы уку елында муниципаль этапта 4 җиңүче, 11 призер укучы, Бөтенроссия фән олимпиадаларының региональ этабында 2 җиңүче, 6 призер, республикада 8 призер, Бөтенроссия фән олимпиадаларының йомгаклау этабында 3 җиңүче һәм 3 призер укучы әзерләгән.
Олимпиада нәтиҗәләре буенча иң алдынгы мәктәпләр дә ачыкланып, лидерлыкны Югары Симет урта мәктәбе һәм “Оникс” мәгариф үзәге яулады. Шулай ук Сабабаш төп һәм Саба урта мәктәбе – 2, Түбән Шытсу төп һәм Эзмә урта мәктәпләре 3 урын яуладылар.
Матур традиция буларак, магистраль газүткәргечләрнең Шәмәрдән линия производство идарәсе җитәкчесе Руслан Иванов быел да өч укучыга акчалата бүләк тапшырды.
Следите за самым важным и интересным в Telegram-каналеТатмедиа
Нет комментариев