КӨТӘМ...

Көтәм әле хәләл җефет 

Кайтыр, диеп эштән;

Үзем кискән токмачлы аш

Инде күптән пешкән.

Көтәм  әле килерләр дип

Газиз балаларым;

Мичтә бәлеш– яраталар

Аны оныкларым.

Көтәм дусларым килгәнне –

Тәмле чәем әзер;

Сөйләшербез, серләшербез,

Кичләр озын хәзер.

Көтәм көзен кояш нуры

Йөзгә сарылуын,

Авыр, кара болытларның

Узып  таралуын.

Көтә күңел якыннарның

Янда булуларын;

Ак кышны – яз, язны җәйләр

Алыштыруларын.

Көтә-көтә гомер үтә:

Кемдер нидер көтә...

Кемдер инде берни көтми:

Соңгы сулыш  җитә...

Шатлыклы көтүләр генә

Булсын һәркемгә дә,

Шул көтүләр илтсә иде

Ап-ак бәхетләргә!

Фото: dobrocom.info