Сабантуйлар атлый җиһанга

Сабантуйлар атлый  җиһанга

Милләтемнең  олы  хәзинәсе,

Чал тарихның гүзәл бәйрәме.

Сабантуйлар  гизә   җиһан буйлап,

Күтәрелә бәйрәм әләме.

Татар җанлы  һәрбер өйне иңли,

Бәйрәм  рухы  һәрбер  күңелдә.

Йөрәкләрдә булган  якты хисләр

Моңнар булып ташып  түгелә.

Мәйдан күрке- көрәш, бил алыша

Пәһлевандай  батыр  егетләр.

Сөлгеләр дә  бу көчләргә түзми,

Шартлап  өзелерләр  кебекләр.

Сабантуйда җиңеп өйрәнгәннәр

 Тормыш сынавына бирешми.

 Көчлеләргә,  ныклы рухлыларга

 Җиңелүләр    һич тә     килешми.

Бәйге арты бәйге кыза тора,

Чык мәйданга -  күрсәт сәләтең!

Сабантуйда  чагыла асылыбыз -

Халкыбызның   бөек халәте!

Сабан тургайлары җыры белән

 Сабантуйлар килә илемә.

Бәйрәм  итсен өчен газиз халкым

Тыныч күкләр телим җиремә.

Фәридә Вилданова. 

Фото: «Саба таңнары» архивыннан алынды