Мәскәүдә — 400 меңлек коммерция директоры, Казанда — 350 меңлек автовоз йөртүчесе: сентябрьнең иң кыйммәтле эшләре аталды.
Сентябрьдә Казанда автовоз йөртүчесенә иң югары хезмәт хакын — 150 меңнән 350 мең сумга кадәр, премияләр һәм ДМС полисын тәкъдим итәләр. Бу турыда эш эзләү буенча SuperJob Россия сервисы аналитиклары хәбәр итә.
Икенче урында — шәхси медицина үзәгендә балалар табиб-неврологы вакансиясе, оклады 150 мең сумнан башлана. Өченче баскычны бизнес өчен сатулар буенча әйдәп баручы менеджер били, ул ай саен 150 мең сум хезмәт хакы алачак, моңа өстәп ДМС полисы һәм читтән торып эшләү мөмкинлеге биреләчәк.
Сәламәтлек страховкалау буенча сатулар менеджеры 120 мең сумга кадәр, ә җитештерү участогы остасы социаль пакет һәм корпоратив ипотека белән 100 меңнән 116 мең сумга кадәр хезмәт хакы алырга әзер.
Сентябрьдә югары хезмәт хаклы тәкъдимнәр исемлегенә сәламәтлек саклау, сәнәгать, төзелеш, IT һәм квалификацияле эшчеләр өлкәсендәге вакансияләр керде. Мәскәүдә лидер — 400 мең сумнан башланучы хезмәт хакы белән коммерция директоры, ә Санкт-Петербургта — 210 мең сум керем белән УЗИ-диагностика табибы булды.
Элегрәк хәбәр ителгәнчә, Россиядә курьерларның хезмәт хакы 1 ел эчендә 23%ка арткан, ә китереп бирү өлкәсендә вакансияләр саны ике тапкырдан да артып киткән.
Чыганак: «Реальное время»
Нет комментариев