"Балкыш" халыкка социаль ярдәм күрсәтү үзәгенең Шәмәрдәндәге тернәкләндерү бүлегендә ел әйләнә өлкән буын кешеләре сәламәтлекләрен ныгыталар.
Биредә ял итүчеләр рәхмәт сүзләрен әйтеп бетерә алмыйлар. Кайсы белән генә сөйләшсәк тә, вакытны файдалы һәм күңелле итеп оештыру өчен барлык шартлар да тудырылуын әйтәләр. "Игенче" колхозында (хәзер "Алтын Саба-М" җәмгыяте) кырык ел механизатор булып эшләгән, хезмәт елында 3нче дәрәҗә Дан орденына лаек булган Шәрифҗан Рамазанов бирегә беренче тапкыр гына килгәнлектән, сөйләр сүзләре дә күп. "Мондый рәхәт җир икәнлеген белмәдем, әллә кайчан килә идем",- ди ул. "Быел безгә дә бәхет елмайды, чын санаторийда ял иттек",- дип куанычларын уртаклаштылар, Теләче районының Тактамыш һәм Баландыш авылларыннан килгән өлкәннәр. Саулыгын тернәкләндерүчеләр арасында Саба урта мәктәбендә озак еллар тарих фәненнән белем биргән Фирая Закирова, 36 ел район газетасы редакциясендә шофер булып эшләгән Фиргать Исламов та үзәктәге шартлардан канәгать булуларын әйттеләр. Биредә ял итүчеләрнең күңелләрен күтәрү өчен төрле чаралар һәм экскурсияләр оештырыла.
Биредә без шушы көннәрдә Өлкәннәр көне уңаеннан уздырылган җанга ятышлы чарада катнаштык. Үзәккә өлкәннәрне тәбрикләү өчен Саба муниципаль районы башкарма комитеты җитәкчесе урынбасары Таһир Шәрәфиев, район халыкны социаль яклау идарәсе начальнигы Марсель Хуҗин, "Балкыш" үзәге җитәкчесе Рөстәм Равилин килде. Таһир Габдерахман улы районыбыз яңалыклары белән таныштырды, өлкәннәрне канатландыра торган матур сүзләрен кызганмады. Өлкәннәргә бәйрәм бүләкләре тапшырылды. "Балкыш" халыкка социаль хезмәт күрсәтү үзәге каршында оештырылган волонтерлар чыгыш ясады.
Аннары сәхнә Шәмәрдән мәдәният йорты каршында эшләп килүче "Тулган ай" ансамбленә бирелде. Яшь күңелле өлкәннәр берләшеп оештырылган бу ансамбль үзенең бай концерт программасы белән сокландырды. Аларның һәр чыгышы көчле алкышларга күмелеп каршыланды.
(Дәвамын газета битләреннән укый аласыз)
Г.Галимуллина.
Иң мөһим һәм кызыклы язмаларны Татмедиа Telegram-каналында укыгыз
