Сабада ветераннар өчен компьютер курслары ачылды

Курсларга төрле яшьтәге пенсионерлар җыелган иде. Укытучыбыз итеп билгеләнгән Илсинә Сәйфиева үз эшенең остасы булып чыкты, барлык өйрәнәсе бүлекләрне дәресләрдә смарт тактага төшереп аңлатты. Текстларны бер телдән икенче телгә күчерергә һәм рәсемнәр белән бизәргә, электрон хатлар язып, музыкаль сәлам җибәрергә дә, вируслы папкаларны чистартырга да өйрәндек. Интернетта шикле сайтларга кермәскә кирәклеге хакында да кисәтелдек. Зур күләмдәге текстларны электрон почта аша җибәрәсе булса, папкаларны кысып, парольләр куеп булганлыгын да беләбез хәзер. Хәзер инде өлкәннәребез "Скайп" аша үзләренен балалары, туганнары белән дә сөйләшә, өйдән чыкмыйча гына электрон түләүләр башкара, район яңалыклары белән "Саба дулкыннары", "Саба таңнары" сайтларына кереп тә таныша ала.