Быел районда 5200гә якын кеше диспансерлаштыру узарга тиеш

Мәгълүм булганча, 2013 елда республиканың район һәм шәһәрләрендә 21 яшьтән башлап барлык халыкка диспансерлаштыру үткәрелә. Даими медицина тикшеренүе үтү күп кенә чирләрне, бигрәк тә йөрәк-кан тамырлары, яман шеш авыруларын вакытында ачыклау, башлангыч стадиясендә дәвалау мөмкинлеге бирә. Быел районда 5200 кеше диспансерлаштыру узарга тиеш. Бушлай булуга карамастан, кайберәүләр әлеге профилактик чарага һаман да битараф кала. Бүгенге көнгә 2500гә якын кешенең хастаханәгә килүе шул хакта сөйли. "Ел ахырына кадәр әле вакыт бар. Райондашларыбызны, үз сәламәтлекләрен кайгыртып, диспансерлаштыруда актив катнашырга чакырабыз", - ди район үзәк хастаханәсе өлкән шәфкать туташы Альбина Хафизова.