Корбанга чалынган сарык ите ярамый

Корбан бәйрәме якынлашканда корбанга чалынган сарык итен приютларга, балалар йортлары-интернатларына тапшыручылар күбәя. Шулай да бу изге гамәлнең санитария нормалары һәм кагыйдәләренә туры килеп бетмәгән ягы бар. Шул уңайдан кулланучыларның хокукларын яклау һәм кеше иминлеге өлкәсендә күзәтчелек итү федераль хезмәтенең Татарстан Республикасы буенча идарәсе социаль хезмәт күрсәтү учреждениеләренә балаларның туклануында бәрән итен файдалану турында хат юллады. Анда язылганча, сарык һәм кәҗә итләрен, шулай ук салосын социаль учреждениеләрдә тәрбияләнүче балалар өчен ашарга әзерләгәндә кулланырга рөхсәт ителми.