Шәмәрдәндә “Игелек һәркемдә бар” волонтерлар отряды төзелде

Шушы көннәрдә районда ирекле рәвештә игелекле гамәлләр кылучылар өчен истәлекле вакыйга булды: Шәмәрдән лицеенда "Игелек һәркемдә бар" волонтерлар отряды төзелде. Күптән түгел алар "Волонтер-2013" төбәкара лагеренда булдылар һәм аннан кайтканнан соң тагын да активлаштылар. Семинарларда укучыларга ирекле рәвештә игелекле гамәлләр кылуның максаты, үзенчәлекләре, волонтерлык хәрәкәтенең мөһим проектлары турында сөйләделәр Балалар өчен психологик тренинг­лар үткәрделәр, сәламәт яшәү рәвеше турында видеороликлар күрсәттеләр. Яңа отрядның координаторы итеп Динара Шәмиева сайланды, Кристина Фазлыева аның урынбасары, Диләрә Ситникова PR-менеджеры булды. Волонтерлар мөмкинлекләре чикләнгән балаларны патронажга алачаклар, сәламәт яшәү рәвешен пропагандалаячаклар.