Шыңар үзешчәннәре – Тинчурин сәхнәсендә

Казан шәһәрендә, Кәрим Тинчурин исемендәге театрда 4 нче Бөтенроссия "Туган тел" форумы узды. Анда Оренбург, Ульян, Мари иле, Төмән өлкәләреннән, Уфа, Мәскәү шәһәрләреннән делегацияләр катнашты. Мәгариф һәм фән өлкәсендә Республика һәм Бөтенроссия күләмендә җиңүчеләрне ТР мәгариф һәм фән министры Энгель Нәвап улы Фәттахов, ТР министрлар кабинеты Аппаратының мәдәният, спорт һәм телләрне үстерү идарәсе башлыгы Гөлшат Рәдиф кызы Нигъмәтуллина, шагыйрь, ТР Дәүләт Советының мәдәният, фән, мәгариф һәм милли мәсьәләләр комитеты рәисе Вәлиев Рәзил Исмәгыйль улы, шагыйрь Роберт Миңнуллин һ.б. котлады. ТР һәм Россиянең халык артисты Илһам Шакиров, ТРның халык артисты Мингол Галиев, ТРның атказанган артисткасы Лилия Муллагалиева кебек данлыклы сәхнә осталары, Актаныштан "Агыйдел" Дәүләт җыр һәм бию ансамбле, "Бәрмәнчек"керәшен Дәүләт фольклор ансамбле һәм башка танылган коллективлар белән бер сәхнәдә Кече Шыңар авылы кызлары, бертуган Алисә, Сөмбел, Энҗе Билаловалар да ("Илһам"иҗат төркеме) чыгыш ясады. Язучы Рәмзия Габделхакованың "Әбием намаз укый"әсәре буенча эшләнгән композицияне тамашачы көчле алкышларга күмде.