Яңа туган баласын 7 нче каттан тәрәзәдән ташлаган ананы 2,5 елга ирегеннән мәхрүм иткәннәр

Казанда 24 яшьлек Римма Сайкунга карата хөкем карары чыгарылды. Ул яңа туган баласын үтергән. Бу хакта бүген ТР прокуратурасы матбугат хезмәте хәбәр итә.
2014 елның 19 августында ул кунакханәдә кыз бала тапкан. Ул су тутырылган пластик шешә белән баланың муенына суккан, аннары полиэтилен пакетка салып 7 нче каттан тәрәзәдән аткан. Бала тән җәрәхәтләреннән үлгән.
Ул үз гаебен тулысынча таныган. Судта хатын-кыз, баланы үзе генә тәрбиялисе килмәү сәбәпле, үтерүен белдергән. Суд Р.Сайкунны 2,5 елга ирегеннән мәхрүм иткән.

Татар-Информ.ру.