Чишмә суын... краннан [+фото]

-Су бик каты известьлы иде. Мунча яккач та икенче көнне савыт төбенә утырган юшкынны түгеп җәфаландык. Шулкадәр шатланам мин моңа, шулкадәр көттек, - ди шушы авылда гомер иткән Нурия Габдрахманова.

-Анысына да рәхмәт, ашау-эчүгә чишмәгә йөрсәк тә, малларга шул суны тоттык, - дип тормыш иптәше Сөләйман ага сүзгә кушыла.

Кирәкле барлык элементларга бай әлеге чишмәнең суы. Авылның чишмә ягында яшәүче Минзәлифә Абдуллина:

-Кыш көннәре кар көрте ерып булса да, эчәр суны шул чишмәдән ташыдым, - дип сөйли. - Менә хәзер өйгә килә, йомшаклыгы кул юганда ук сизелә.

Кыска срокта, әмма сыйфатлы итеп ясап чыккан Саба күп тармаклы торак-коммуналь хуҗалыгы.

-Ай ярым эчендә, авылга кадәр 250 метр торба сузып, 5 метр тирәнлектә кольцолар урнаштырып, насослар куеп, суны башняга тутырып авылга чишмә суы килә торган иттек, игелеге булсын, - ди торак-коммуналь хуҗалыгы җитәкчесе Илнур Хәбибуллин. - Авыл җирлегенә тирә ягын койма белән әйләндереп алырга гына кала.

Авыл эчендә, халык телендә Насыйбулла чиш­мәсе дип йөртелүче кизләү дә бар. Әмма болынлыкта челтерәп агып яткан, хәзер краннан агучы чишмәнең суын сыйфатлы һәм шифалы булуын әйтә авыл халкы.