Олы Кибәчедә ир балалар азан әйтүдә көч сынаштылар

 Олы Кибәче авылында малайлар арасында азан әйтүчеләр бәйгесе узды. Ул шушы авылда 30 елга якын имам ярдәмчесе булып эшләгән, ислам динен үстерүгә көчен куйган Рафаэль Шәрәфиев истәлегенә багышлап үткәрелә. Быел бәйгедә Олы һәм Кече Кибәче, Төбәк, Олыяз авылларыннан, Теләче районының Сауш, Олы һәм Түбән Саурыш, Җәнәй авылларыннан 30 бала катнашты. 6-10 яшьлекләр арасында беренче урын Төбәктән Җәмил Сафинга, икенче урын Олы Кибәчедән Тимур Маланинга, өченче урын Сауштан Йосыф Сәйфетдиновка бирелде. 11-16 яшькәчә балалар арасында Олы Кибәчедән Әмир Мөхәммәтҗанов җиңү яулады. Икенче-өченче урыннарны Олы Кибәчедән Вильдан Бәшәров, Түбән Саурыштан Әмир Шәймәрданов бүлеште.Шаян ТВ каналының махсус бүләгенә 4 яшьлек Илдан Сибгатуллин, Сөләйман Яһүдин,Мансур Хуҗаәхмәтов лаек булды. Аларны Күчтәнәч тапшыруын алып баручы Дәү әни - Әлфинур Хисами тапшырды. Балалар азан савабы, дини тәрбия турында Лесхоз имам хатыйбы  Әхмәт хәзрәт белән Казанның Гаилә мәчете имам-хатыйбы Рөстәм хәзрәт Хәйруллинның мәгьнәле вәгазьләрен тыңлады. Бәйгегә шушы авылдан чыккан, читтә яшәүче авылдашлары матди ярдәм күрсәтте. Җиңүчеләргә һәм барлык катнашучыларга бүләкләр тапшырылды.