Сабада балалар өчен Азан әйтү һәм вәгазь сөйләү бәйгесендә 40лап бала катнашты
Дини чараны җәмигъ мәчеттә Казандагы «Саба якташлары» иҗтимагый оешмасы оештырды.
"Саба якташлары" оешмасы менә икенче елын инде изге Рамазан аенда балалар өчен шундый матур бүләк әзерли. Малайлар татар мәкаме белән, дөрес итеп азан әйтүдә көч сынашса, кызлар вәгазь сөйләү буенча бәйге тоталар. Малайларның азан әйтүләренә Саба җәмигъ мәчете имамы Алмаз хәзрәт Гаянов җитәкчелегендә хәзрәтләребез бәя бирде. Кызлар арасында иң оста һәм аңлаешлы итеп вәгазь сөйләүчене ачыкларга мәчеттә белем бирүче мөгаллимәләр ярдәмгә килделәр. Алар һәр баланың чыгышын игътибар белән тыңлап, тиешле балларны кәгазь битенә төшереп бардылар. Кызларыбыз сөйләгән вәгазьләр дә мәгънәле, эчтәлекле булулары белән игътибарны җәлеп итте. Аларның чыгышларын Сабадан мөгаллимәләр Рәсимә ханым Рәхимова, Лесхоздан Рәсилә ханым Галиева бәяләде. Дини бәйгедә 40ка якын бала үзен сынап карады. Җиңүчеләрне тәбрикләргә районыбыз җитәкчеләре дә килде. Саба муниципаль районы башлыгы урынбасары Расих Закирҗанов изге айда шундый чара оештырганнары өчен «Саба якташлары» җәмгыятенә рәхмәтен җиткерде, балаларга да кечкенәдән шундый дини булып үсүләренә, аларны тәрбия кылган әти-әниләренә ихтирамын белдерде, уңышларының дәвамлы булуын теләде.
Нәтиҗәләр чыгарылгач, бәйгенең иң яхшы азанчыларын һәм оста вәгазьчеләрне Татарстан Республикасы төзелеш, архитектура һәм торак-коммуналь хуҗалык министры урынбасары, «Саба якташлары» иҗтимагый оешмасының җитәкчесе Мәҗит Салихов тәбрикләде, Саба районы мөхтәсибе Айнур хәзрәт Әхмәтов та һәр балага бүләкләрен таратты. Иң яхшы азан әйтүчеләр булып Нәсим Арсланов (Мишәбәш), Әмир Газизов (Шәмәдән), Алим Габделхаков (Шекше), кызлардан оста вәгазьчеләр булып Фирүзә Ярмиева (Явлаштау), Ралинә Ханнанова (Шекше), Камолова Сафия (Саба) табылды.
Следите за самым важным и интересным в Telegram-каналеТатмедиа
Нет комментариев