Яшәү рәхәт булыр иде

Һәрбер йөрәк миһербанлы булса, 
Бер-берсенә ярдәм кулы сузса,
Дөнья йөге авыр булмас иде,
Күңелләргә сагыш тулмас иде. 

Әдәп-әхлак һәрчак сакта булса,
 Намус-вөҗдан янәшәдә торса,
Гадел, тыйнак булса һәрбер кеше,
Бик бәхетле булыр олы-кече. 

Дус-туганның кадерләрен белеп, 
Һәр шатлыкны бергә-бергә үреп,
Яши белсәң, ямьле дөнья көтү,
Бәйрәм булыр иде гомер итү.

Яшәү авыр, дөнья катлаулы дип,
Юатабыз юкка  күңелне.
Дөнья түгел, без үзебез мең кат-
Аннан катлаулырак түгелме?
Фәридә Вилданова