Казанда егет белән кызны бар каравылчысы кыйнавы турында мәгълүматны тикшерәләр

Полицейскийлар Казанда бар каравылчыларының яшь парны кыйнавы турындагы мәгълүматны тикшерә. Бу хакта «Татар-информ» агентлыгына Россия Эчке эшләр министрлыгының Казан шәһәре буенча идарәсе матбугат хезмәтеннән хәбәр иттеләр.

Гадәттән тыш хәл 25 октябрьдә булган. Видеосы исә (анда каравылчы «Руки вверх» бары каршында урамда бер егетне тәпәч белән кыйный) социаль челтәрдәге Казан паблигында чыкты.

«Җомга көнне туганымның туена барган идем. Кафеда утырганнан соң яшьләр Бауман урамындагы бер клубка юл тотты. Әмма күңел ачасы урынга сугышчылар клубына эләктеләр һәм нәтиҗәдә яшь пар беренче кичен «Япеев» полиция бүлегендә үткәрергә мәҗбүр булды. Алар төрле тән җәрәхәтләре алган, шаһитның теш казнасын һәм борынын сындырганнар», - дип язган видео авторы.

Россия Эчке эшләр министрлыгының Казан шәһәре буенча идарәсе матбугат хезмәтеннән хәбәр итүләренчә, 26 октябрьдә ике егет һәм бер кыз үзләрен кыйнаган бар каравылчыларын җаваплылыкка тарту үтенече белән гариза язган.

Шуннан соң полицейскийлар тикшерү эшләрен башлаган. Зыян күрүчеләрнең өчесе дә медицина ярдәме сорап мөрәҗәгать иткән.

«Суд-медицина экспертизасы аларның сәламәтлегенә килгән зыянның авырлыгын билгеләячәк. Хәзерге вакытта полицейскийлар, хәлнең бөтен нечкәлекләрен ачыклау өчен, видеокамера язмаларын өйрәнә. Шуның нигезендә процессуаль карар кабул ителәчәк», - дип аңлаттылар полиция бүлегендә. 

Фото: скриншот видео из соцсетей

Чыганак: tatar-inform.tatar