Тукай районында «КАМАЗ» белән бәрелешкән машина йөртүчесе исән калган

Тукай районында бетонболгаткыч белән бәрелешкән җиңел машина йөртүчесе исән калган. Бу хакта «Татар-информ»ның махсус корреспонденты хәбәр итте.

«Авария М7 юлында Түгәрәк Кыр бистәсе борылышында килеп чыккан. 10нчы модельле «Лада» Чаллы ягына бара торган булган. Шул чакта «КАМАЗ» борыла башлаган һәм шунда алар бәрелешкән», — дип сөйләде агентлык корреспонденты. 

Җиңел машина йөртүчесен хастаханәгә озатканнар. Аның күкрәк читлегенә зыян килгән. Автомобиле тимер өеменә әйләнеп калган.

Фото: Валентин Кулагин

tatar-inform.tatar