Лаеклы ялда булып та эшләүчеләр киләчәктә пенсиядән бөтенләй колак кагарга мөмкин
"Стратегик эшләнмәләр үзәге" фонды утырышында Россия Президенты каршындагы Дәүләт хезмәте һәм халык хуҗалыгы академиясе белгече Юрий Горлин шундый тәкъдим белән чыккан. Дөрес, бу кагыйдә елына 1 миллион сумнан артык табыш алып эшләгән пенсионерларга гына кагыла.
Горлин тәкъдиме хуплау таба калса, аена 83 мең сумнан артык табыш алып эшләүче пенсионерларга пенсия түләнмәскә тиеш була. Тик утырышта бу фикерне бик азлар гына хуплаган. Проект авторы исә бу тәкъдим бүген бик актуаль дигән фикердә. "Пенсия - хезмәт хакы алмый башлагач хасил булган бушлыкны тутыру чарасы. Шуңа күрә зур күләмдә табыш алып көн күрүче кайберәүләрнең шуңа өстәп әле пенсия дә алуы - зур гаделсезлек", - ди ул. Горлин китергән мәгълүматларга ышансаң, бүген Россиядәге барлык пенсионерларның 10 проценты, төгәлрәк әйткәндә, 400-500 мең кеше аена бер миллионнан да күбрәк табыш алып эшли. "Аларга пенсия түләмәсәң, Россия Пенсия фондында елына 100 миллиард сум акча янга калачак", - ди проект авторы.
Дөрес, мондый тәкъдим беренче тапкыр гына яңгырамый. Узган ел Россия Хезмәт министрлыгы "Эшләүче пенсионерларга пенсия түләү үзенчәлекләре турында" закон проекты әзерләгән иде. Тик хөкүмәт, бу тәкъдимнән баш тартып, эшләүче пенсионерларга түләнүче пенсия күләмен арттырмаска дигән фикердә тукталды.
Следите за самым важным и интересным в Telegram-каналеТатмедиа
Нет комментариев