Мәхәббәт көймәсендә

Язмышымны сиңа тапшырдым,

Хыялымны чынга ашырдым.

Синең кулда - тормыш көймәсе,

Дулкын, берүк, бәрә күрмәсен.

Зилзиләле тормыш диңгезен

Кичү авыр , диләр берүзең.

Кирәк икән терәк-җилкәнең

Сынау өчен көчен җилләрнең.

Бик ярсулы диңгез өсләре,

Җилкәннәрнең җитми көчләре.

Турылыгы өчен юлларның

Бер булуы кирәк уйларның.

Юллар озын, юллар бик ерак,

Адашмаска кирәк бер маяк.

Бер көймәдә хәзер икебез -

Мәхәббәткә баттык инде без.

Фәридә Вилданова.