Психолог чыгарылыш сыйныф укучыларына стресска каршы көрәш алымнарын аңлатты

Республика балалар клиник хастаханәсе психологы Лия Бодрова укучыларга имтиханга әзерләнгәндә стресска дучар булмас өчен, мөһим кагыйдәләрне үтәү кирәклеген әйтте. Бу турыда ул «Татар-информ» мәгълүмат агентлыгы хәбәрчесенә сөйләде.

Чыгарылыш сыйныф укучылары Бердәм дәүләт имтиханнарына әзерлекләрен белер өчен сынау имтиханнары тапшыра. Бу вакытта баланың психикасына начар йогынты булмасын өчен, дүрт кагыйдәне истән чыгармаска кирәк.

«Беренчедән, уку вакыты 40-45 минут булырга тиеш, 20 минутлык тәнәфесләр ясарга кирәк. Икенче кагыйдә — кичке унбердән дә соңга калмыйча йокларга яту. Өченчедән, дөрес тукланырга кирәк. Дүртенчедән, кислород балансын саклау өчен, күнегүләр ясарга һәм ешрак саф һавада булырга кирәк», — диде психолог.

Лия Бодрова әйтүенчә, әлеге кагыйдәләрне һәр көнне даими рәвештә үтәгәндә, баланың хәтере яхшы була, игътибарлылык арта, мәгълүмат та җиңелрәк үзләштерелә. 

Фото: Лия Бодрованың шәхси архивыннан

Чыганак: tatar-inform.tatar