Районыбыз белгечләре белемнәрен арттырып кайтты

"Татарстанның агробизнес кадрларын яңадан әзерләү институты" өстәмә һөнәри белем бирү федераль дәүләт бюджет мәгариф учреждениесендә язгы кыр эшләрен башкаруның оптималь эш планнарын эшләү буенча белгечләрне укыту дәвам итә. Укулар муниципаль районнарның авыл хуҗалыгы һәм азык-төлек идарәләре башлыклары, игенчелек буенча консультантлары, авыл хуҗалыгы оешмалары, агрохолдинглар агрономнары, КФХ башлыклары өчен оештырыла. 2-3 февральдә курсларда безнең район белгечләре дә белемнәрен арттырып кайтты. Укулар ике көнлек курслардан гыйбарәт (теоретик һәм практик өлешләр). Укырга килүчеләр курсларның гамәли өлешендә, хуҗалыкларның финанс хәлен исәпкә алып, чәчүлекләрнең оптималь структурасын, авыл хуҗалыгы культураларының сортларын, яклау чараларын сайларга өйрәнәләр.