Россия почтасы тармагында эшләүчеләрнең хезмәт хаклары арта

2016 елда Россия почтасы тармагында эшләүчеләрнең хезмәт хаклары артачак. Дөрес, Татарстанда хат ташучыларның, почта операторларының хезмәт хакы 1 декабрьдән үк артты инде. Ә 2016 елның 1 февраленнән почтамтлардагы башка персоналның да эш хаклары арту көтелә. Матбугатны, шул исәптән "Саба таңнары"н да газета укучыларга җиткерүчеләрнең бераз булса да күбрәк акча ала башлауларына без дә куандык. Без хат ташучыларга иң якын хезмәттәшләребез итеп карыйбыз, хезмәт хаклары артуы абунәчеләребезнең тагын да күбәюендә чагылыш табачагына ышаныч белдерәбез.