Татарстанда пассажир автобусларын кулга алу проектын яңартырга телиләр

Татарстанда хокук бозулар өчен пассажир автобусларын кулга алу проектын гамәлгә ашыруны яңартырга телиләр. Тиешле мөрәҗәгать республика Хөкүмәтенә җибәрелде, дип хәбәр итте Ространснадзор дәүләт юл күзәтчелеге Урта Идел регионара идарәсе башлыгы вазифаларын башкаручы Радик Рамазанов «Татар-информ» мәгълүмат агентлыгына биргән интервьюсында.

Мәгълүмат агентлыгы әңгәмәдәше сүзләренчә, законсыз ташучылар белән көрәшүнең нәтиҗәле ысулы - транспорт чарасына арест салу.

"Татарстан Министрлар Кабинеты безгә каршы килде һәм без билгеле бер чорга "Юл хәрәкәте куркынычсызлыгы" учреждениесе белән сынау килешүе төзедек. Бу кулга алуларның нәтиҗәлелеге бик югары булган. Шуңа күрә без мондый проектны алга таба гамәлгә ашыру турында тәкъдимнәр җибәрдек. Хәзерге вакытта материаллар карауда. Киләсе елдан әлеге практика яңартылыр, дип уйлыйм”, - диде ул.

Рамазанов ачыклаганча, пилот проектын гамәлгә ашыру чорында, майдан июльгә кадәр, сигез автобус кулга алынган. Шул исәптән, биш автобус маршрут картасыннан башка йөргән. Бер транспорт чарасының пассажирларны иминиятләштерүгә шартнамәсе булмаган. Һәм тагын ике автобус лицензия таләпләрен бозган өчен кулга алынган - алар реестрга кертелмәгән.

"Алты юридик зат җаваплылыкка тартылды, аларга 440 мең сум штраф салынды. Автобуслар кулга алынган мәйданчыкларда 6-31 көнгә кадәр урнаштырылган. Штрафлар түләгәнче, без автобусларны бирмәдек ", - дип билгеләде идарә башлыгы вазифаларын башкаручы.

Пассажир автобусларын кулга алу Россиянең күп төбәкләрендә кулланыла. Әйтик, Башкортстанда узган ел 100 дән артык автобус кулга алынган. Мәскәүдә ел саен меңнән артык транспорт чарасы кулга алына, шул исәптән такси да.

Фото: архив ИА "Татар-информ"

Чыганак: tatar-inform.ru