Саба таңнары

Сабинский район

Яңалыклар

Татарстанда һәр бишенче бала тулы гаиләдә тумый

Ниһаять, май ае узды... Һәм гомер юлын бергә үтәргә, матур тормыш корып, газиз балалар үстерергә хыялланган парлар көтеп алган җәй - туйлар сезоны җитте. Иң күп туйлар, традиция буенча, августта уйнала. Татарстан Министрлар Кабинетының ЗАГС идарәсе мәгълүматларына караганда, үткән ел республикада 32 547 пар язылышкан, бу 2013 ел белән чагыштырганда...

Ниһаять, май ае узды... Һәм гомер юлын бергә үтәргә, матур тормыш корып, газиз балалар үстерергә хыялланган парлар көтеп алган җәй - туйлар сезоны җитте. Иң күп туйлар, традиция буенча, августта уйнала.

Татарстан Министрлар Кабинетының ЗАГС идарәсе мәгълүматларына караганда, үткән ел республикада 32 547 пар язылышкан, бу 2013 ел белән чагыштырганда 3,1 процентка азрак. Бигрәк тә Әлмәт, Алабуга, Чистай районнарында бик күп туйлар гөрләгән.

Шулай ук узган ел 15 106 пар гаиләсен таркатырга - аерылышырга теләк белдергән. 2015 елның беренче кварталы күрсәткечләре: 4 620 пар язылышкан, 3 201 пар аерылышкан.

Республикада әле дә һәр бишенче пар милләтара никахка керә, 2014 елда 6 123 милләтара никах тергәлгән, ул - әлеге чорда төзелгән никахларның 19 процентын тәшкил итә. 2015 елның беренче кварталына да инде 925 милләтара никах төзелгән.

Татарстанда дөньяга килгән һәр бишенче бала, кызганычка, һаман да тулы булмаган гаиләдә туа. Үткән ел 9 871 бала тулы булмаган гаиләдә туган (2013 елда - 10 496), бу - 2014 елда дөньяга аваз салган сабыйларның 17 проценты дигән сүз (2014 елда барлыгы 57 263 бала туган). Агымдагы елның беренче кварталында 2 384 баланың тулы булмаган гаиләдә дөньяга килүе мәгълүм.

2014 елда Татарстанда яңа туган сабыйларны бала тудыру йортында калдырып чыгу очраклары 25 процентка кимегән (2014 елда - 76 очрак, 2013 елда - 101). Татарстанда бала хокукларын яклаучы вәкилнең 2014 елга хисап мәгълүматлары буенча, республикада 11 192 бала, ягъни безнең төбәктәге бөтен ятимнәрнең 93,4 проценты, гаиләләрдә тәрбияләнә. 600ләп бала исә балалар йортларында, мәктәп-интернатларда яши.

Узган ел республикадагы 1 195 ятим һәм караучысыз калган бала гаиләгә урнаштырылган: 755 бала - опекага, 327 бала килешү буенча гаиләләргә тәрбиягә, ә 113 бала уллыкка бирелгән. Соңгысында 109 баланы Россия гражданнары, ә 4 баланы Италия гражданнары алып киткән. Татарстан Министрлар Кабинетының ЗАГС идарәсе, үз чиратында, үткән ел Татарстан гаиләләренең уллыкка һәм кызлыкка барлыгы 399 бала алуын теркәгән.

Хәзерге вакытта республикада 2 658 гаилә барлыгы 2 812 баланы уллыкка һәм кызлыкка алып, үз баласы кебек тәрбияләп үстерә. Ә менә инвалид балаларны, 7 яшьтән зуррак булганнарны һәм бертуган балаларны уллыкка һәм кызлыкка алган өчен дәүләттән бер тапкыр 100 мең сум күләмендә пособие түләнүенә кызыкмыйлар. Татарстан Мәгариф һәм фән министрлыгы мәгълүматларына караганда, 2014 елда республикадагы бары тик 1 инвалид баланы һәм 7 яшен узган өч баланы гына уллыкка алырга теләк белдергәннәр. Югыйсә, опека һәм попечительлек органнарында уллыкка бала көткән йөзләгән гаилә чиратта тора.

Лилия ГАДЕЛШИНА
Интертат.ру
№ | 01.06.2015

Следите за самым важным и интересным в Telegram-каналеТатмедиа

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев